धाराशिव: शहरात नियमांचे उल्लंघन करून मिरवणुकीत कानठळ्या बसवणारा आणि कर्णकर्कश आवाजात ‘डॉल्बी डीजे’ लावून ध्वनी प्रदूषण करणाऱ्या डीजे चालकाविरुद्ध धाराशिव शहर पोलीस ठाण्यात गुन्हा दाखल करण्यात आला आहे. पोलिसांनी दिलेल्या आवाजाच्या मर्यादेच्या सूचनांचे उल्लंघन केल्यामुळे आणि सर्वोच्च न्यायालयाच्या नियमांना केराची टोपली दाखवल्यामुळे ही कडक कारवाई करण्यात आली आहे.
मस्तान ऊर्फ सलमान इक्बाल शेख (वय २१, रा. अक्कलकोट रोड, सोलापूर) असे गुन्हा दाखल झालेल्या संशयित डीजे चालकाचे नाव आहे.
पोलीसांच्या आदेशाचे केले उल्लंघन
धाराशिव शहर पोलिसांनी दिलेल्या माहितीनुसार, रविवार दि. ३१ मे रोजी संध्याकाळी सव्वासात वाजेच्या सुमारास शहरातून एक मिरवणूक काढण्यात आली होती. या मिरवणुकीमध्ये पारंपारिक वाद्यांचा वापर न करता आयोजकांनी आणि चालकाने एका वाहनावर (टॉप व बस) अवाढव्य ‘डॉल्बी डीजे’ साऊंड सिस्टीम लावली होती.
मिरवणूक सुरू असताना डीजेचा आवाज प्रशासनाने ठरवून दिलेल्या ध्वनी तीव्रतेच्या मर्यादेपेक्षा कितीतरी पटीने अधिक आणि मानवी कानांना त्रासदायक ठरेल असा कर्णकर्कश ठेवण्यात आला होता. परिसरात उपस्थित असलेल्या पोलीस पथकाने चालकाला आवाज कमी करण्याच्या सूचना दिल्या होत्या, मात्र पोलिसांच्या आदेशाचे सर्रास उल्लंघन करत डीजेचा दणदणाट सुरूच ठेवण्यात आला.
पर्यावरण संरक्षण कायद्यान्वये गुन्हा नोंद
सार्वजनिक शांतता भंग केल्याप्रकरणी आणि मोठ्या आवाजामुळे नागरिकांना त्रास दिल्याबद्दल पोलिसांनी तात्काळ कारवाई करत संगीत यंत्रणा थांबवली.
याप्रकरणी डीजे चालक मस्तान ऊर्फ सलमान शेख याच्याविरुद्ध भारतीय न्याय संहिता (BNS) कलम २२३, २८९, २७०, २९३ सह ‘पर्यावरण संरक्षण अधिनियम’ (Environment Protection Act) कलम ३ व १५ आणि ‘ध्वनी प्रदूषण नियम २०००’ चे कलम ३, ४, ५, ६ अन्वये धाराशिव शहर पोलीस ठाण्यात गुन्हा नोंदवण्यात आला आहे.
पोलिसांचा कडक इशारा:
उत्सवाच्या किंवा मिरवणुकीच्या काळात शहरात नियमापेक्षा जास्त आवाजात डीजे लावणाऱ्यांवर आणि सर्वोच्च न्यायालयाच्या आदेशाचे उल्लंघन करणाऱ्यांवर यापुढेही अशीच कठोर कायदेशीर कारवाई केली जाईल, असा कडक इशारा धाराशिव शहर पोलिसांनी दिला आहे. प्रकरणाचा पुढील तपास पोलीस करत आहेत.
