धाराशिव: शहरातील एका नामांकित स्पा सेंटरमध्ये सुरू असलेल्या अनैतिक देह व्यापाराचा पोलिसांनी पर्दाफाश केला आहे. धाराशिव शहरातील ‘ओरा’ (Aura) स्पा सेंटरवर छापा टाकून पोलिसांनी ५ पीडित महिलांची सुटका केली असून, स्पा चालकासह व्यवस्थापकाविरुद्ध गुन्हा दाखल केला आहे.
मिळालेल्या माहितीनुसार, धाराशिवच्या पोलीस अधीक्षक श्रीमती रीतु खोखर आणि अपर पोलीस अधीक्षक श्री. सचिन पांडकर यांच्या मार्गदर्शनाखाली जिल्ह्यात अवैध धंद्यांचे समूळ उच्चाटन करण्यासाठी विशेष मोहीम राबवली जात आहे. या मोहिमेची विशेष जबाबदारी परिविक्षाधीन पोलीस उपअधीक्षक श्री. अमोल मोहिते यांच्यावर सोपवण्यात आली आहे.
‘पंटर’ पाठवून केली खात्री
पोलीस उपअधीक्षक अमोल मोहिते यांना ओरा स्पा सेंटरमध्ये अनैतिक मानवी वाहतूक आणि व्यावसायिक लैंगिक शोषण सुरू असल्याची गोपनीय माहिती मिळाली होती. या माहितीच्या आधारे काल, मंगळवार दि. २ जून २०२६ रोजी पोलिसांच्या पथकाने ‘पंटर’ (बनावट ग्राहक) पाठवून या ठिकाणी बेकायदेशीर कृत्य सुरू असल्याची खात्री केली. त्यानंतर शासकीय पंचांसमक्ष या स्पा सेंटरवर धडक छापा टाकण्यात आला.
५ महिलांची सुटका, गुन्हा दाखल
या धडक कारवाई दरम्यान स्पा सेंटरमध्ये व्यावसायिक लैंगिक शोषण (अनैतिक व्यापार) सुरू असल्याचे रंगेहात आढळून आले. पोलिसांनी तातडीने कारवाई करत तेथून ५ महिलांची सुटका केली. या महिलांना पुढील कायदेशीर प्रक्रियेसाठी संबंधित प्राधिकरणाकडे पाठवण्यात येत आहे. या प्रकरणी स्पा सेंटरचे व्यवस्थापक, चालक आणि इतर संबंधित आरोपींविरुद्ध ‘अनैतिक मानवी वाहतूक (प्रतिबंध) अधिनियम, १९५६’ (PITA) अंतर्गत गुन्हा दाखल करण्यात आला आहे.
कारवाईत सहभागी पथक
सदर यशस्वी कारवाईमध्ये परिविक्षाधीन पोलीस उपअधीक्षक अमोल मोहिते यांच्यासह एएचटीयू (AHTU) चे पोलीस निरीक्षक श्री. एम. एन. शेळके, पोलीस उपनिरीक्षक सोनटक्के, पोलीस अंमलदार माने, दूधभाते, कंदळे, नाईकवडी, किवंडे, केवके, महिला पोलीस हवालदार पुरी, जाधव आणि पोलीस वाहन चालकाने सहभाग घेतला.
पोलिसांचा सज्जड इशारा: “धाराशिव जिल्ह्यातील अवैध धंद्यांचे समूळ उच्चाटन करण्यासाठी ही धडक मोहीम यापुढेही अत्यंत तीव्र गतीने सुरू राहील. बेकायदेशीर व अनैतिक व्यवसायांत सामील असलेल्या कोणत्याही घटकाची गय केली जाणार नाही.” — जनसंपर्क विभाग, धाराशिव पोलीस
