धाराशिव : जिल्ह्यात चोरी आणि नुकसानीच्या घटनांमध्ये मोठी वाढ झाली असून, नळदुर्ग, कळंब आणि वाशी पोलीस ठाण्यांच्या हद्दीत तीन वेगवेगळ्या घटना उघडकीस आल्या आहेत. यात तुळजापूर तालुक्यातील चिकुंद्रा शिवारात पवनचक्कीचे ट्रान्सफॉर्मर फोडून तब्बल ३६ लाखांचे नुकसान करण्यात आले आहे. तर कळंब बसस्थानकात प्रवाशाच्या खिशातील रोकड आणि वाशी तालुक्यात यात्रेतून दुचाकी पळविल्याचे प्रकार समोर आले आहेत. याप्रकरणी बुधवारी (ता. २२) संबंधित पोलीस ठाण्यांत गुन्हे दाखल करण्यात आले आहेत.
पवनचक्कीचे तब्बल ३६ लाखांचे नुकसान
तुळजापूर तालुक्यातील चिकुंद्रा शिवारात पवनचक्कीची (लोकेशन आर.एस.एल.) तोडफोड करून लाखो रुपयांचे साहित्य चोरीला गेल्याचा व नुकसान केल्याचा धक्कादायक प्रकार घडला आहे. दि. १३ एप्रिल रोजी सकाळी ८ ते रात्री ८ वाजेच्या सुमारास अज्ञात व्यक्तींनी पवनचक्कीचे कॉपर वायर तोडून ट्रान्सफॉर्मरमधील २,६०० लिटर ऑईल खाली सोडून दिले (किंमत २ लाख ८० हजार ८०० रुपये). तसेच ट्रान्सफॉर्मर पूर्णपणे निकामी करून एकूण ३५ लाख रुपयांचे नुकसान केले. यासोबतच १ लाख रुपये किमतीचे कॉपर वायर व बस बार चोरून नेले. याप्रकरणी पांडुरंग माणिक गरड (वय ३५, रा. चिकुंद्रा, ता. तुळजापूर) यांनी दिलेल्या फिर्यादीवरून नळदुर्ग पोलीस ठाण्यात भारतीय न्याय संहिता (BNS) कलम ३०३(२), ३२४(५) अन्वये गुन्हा दाखल करण्यात आला आहे.
बसस्थानकात प्रवाशाचे ४३ हजार लांबविले
कळंब येथील बसस्थानकावर गर्दीचा फायदा घेत एका प्रवाशाच्या खिशातील ४३ हजार ५०० रुपयांची रोकड लांबविल्याची घटना मंगळवारी (ता. २१) सकाळी १०.३० ते ११.३० च्या सुमारास घडली. निलेश विष्णुदास मालपानी (वय ३६, रा. साईनगर, परळी रोड, कळंब) हे बसस्थानकावर ‘कळंब-धाराशिव’ बसमध्ये चढत असताना अज्ञात भामट्याने त्यांच्या पँटच्या खिशातून ही रोकड हातोहात लंपास केली. याबाबत निलेश मालपानी यांनी बुधवारी (ता. २२) दिलेल्या तक्रारीवरून कळंब पोलीस ठाण्यात अज्ञात व्यक्तीविरोधात भा.न्या.सं. कलम ३०३(२) नुसार गुन्हा नोंदवण्यात आला आहे.
पखरुड यात्रेतून दुचाकीची चोरी
वाशी तालुक्यातील पखरुड येथील यात्रेतून एका भाविकाची दुचाकी चोरीला गेली आहे. गोकुळ धोंडीबा कराळे (वय ५१, रा. चिंचपूर ढगे, ता. भूम) हे दि. ३ एप्रिल रोजी पखरुड यात्रेसाठी गेले होते. सकाळी ९ वाजेच्या सुमारास भैरवनाथ मंदिराजवळ त्यांनी त्यांची ‘हिरो स्प्लेंडर प्लस’ (एमएच २५ ए.सी. ०५०१) ही ३० हजार रुपये किमतीची दुचाकी लावली होती. अज्ञात चोरट्याने ती गर्दीचा फायदा घेत चोरून नेली. याप्रकरणी वाशी पोलीस ठाण्यात गोकुळ कराळे यांनी दिलेल्या प्रथम खबरेवरून भा.न्या.सं. कलम ३०३(२) अन्वये गुन्हा दाखल करण्यात आला आहे.
