वाशी : अज्ञात कारणावरून एका ६० वर्षीय वृद्ध महिलेला जबरदस्तीने विहिरीत ढकलून तिची हत्या केल्याची धक्कादायक घटना वाशी तालुक्यातील निपाणी शिवारात उघडकीस आली आहे. याप्रकरणी वाशी पोलीस ठाण्यात दोघांवर खुनाचा गुन्हा दाखल करण्यात आला असून, या घटनेमुळे परिसरात एकच खळबळ उडाली आहे. बदामबाई सूर्यभान गिते (वय ६०, रा. आंद्रुड, ता. भूम, जि. धाराशिव) असे खून झालेल्या वृद्ध महिलेचे नाव आहे.
याबाबत पोलिसांनी दिलेली अधिक माहिती अशी की, बदामबाई गिते या आंद्रुड येथील रहिवासी आहेत. मंगळवारी (ता. २१) मध्यरात्री साडेबारा ते सकाळी आठ वाजेच्या दरम्यान आरोपी प्रशांत राम महाकले (रा. लांजेश्वर, ता. भूम) आणि गणेश राजेंद्र गिरी (रा. आंद्रुड, ता. भूम) यांनी बदामबाई यांना निपाणी शिवारातील एका विहिरीजवळ नेले. तेथे अज्ञात कारणावरून आरोपींनी त्यांना जबरदस्तीने विहिरीत ढकलून दिले. पाण्यात बुडून बदामबाई यांचा मृत्यू झाला.
या घटनेची माहिती मिळताच परिसरात खळबळ उडाली. याप्रकरणी मयत महिलेचे पती सूर्यभान एकनाथ गिते (वय ७०, रा. आंद्रुड) यांनी बुधवारी (ता. २२) वाशी पोलीस ठाण्यात धाव घेत प्रथम खबर दिली.
सूर्यभान गिते यांनी दिलेल्या फिर्यादीवरून वाशी पोलीस ठाण्यात आरोपी प्रशांत महाकले आणि गणेश गिरी या दोघांविरोधात भारतीय न्याय संहिता (BNS) कलम १०३(३) आणि ३(५) अन्वये खुनाचा गुन्हा नोंदवण्यात आला आहे. आरोपींनी हे कृत्य नेमक्या कोणत्या कारणासाठी केले, हे अद्याप समजू शकले नसून वाशी पोलीस या प्रकरणाचा अधिक तपास करत आहेत.
