धाराशिव : धाराशिव जिल्ह्यात चोरांसह गुन्हेगारांचा सुळसुळाट वाढला असून, वाशी, कळंब आणि नळदुर्ग पोलीस ठाण्याच्या हद्दीत गुन्हेगारीच्या एकामागोमाग एक घटना समोर आल्या आहेत. यात लाखांची घरफोडी, दुकाने फोडणे, दुचाकी आणि केबल चोरीसह घरासमोरून ट्रॅक्टर जबरदस्तीने पळवून नेण्याचा प्रयत्न झाल्याचे उघडकीस आले आहे. याप्रकरणी संबंधित पोलीस ठाण्यांमध्ये विविध गुन्हे दाखल करण्यात आले आहेत.
वाशी : घरासमोरून ट्रॅक्टर पळवण्याचा प्रयत्न
दहिफळ शिवारात राहणारे हरिदास व्यंकटराव विर (वय ५८, रा. वीर वस्ती शेंडी, ता. वाशी) यांचा ट्रॅक्टर (क्र. एमएच २५ एएल ०३०८) सोमवारी (ता. २० एप्रिल) सकाळी साडेअकराच्या सुमारास प्रकाश चंद्रकांत पवार (रा. लोणखस) आणि त्याच्यासोबतच्या दोन अनोळखी व्यक्तींनी घरासमोरून जबरदस्तीने पळवून नेण्याचा प्रयत्न केला. सुदैवाने फिर्यादी यांना हा प्रकार वेळीच लक्षात आला. याप्रकरणी हरिदास विर यांच्या फिर्यादीवरून वाशी पोलीस ठाण्यात भारतीय न्याय संहिता (BNS) कलम ३०९(४), ३(५) अन्वये गुन्हा दाखल करण्यात आला आहे.
कळंब : घरफोडीत पावणेचार लाखांचा ऐवज लंपास
कळंब तालुक्यातील बोर्डा येथे घरफोडीची मोठी घटना घडली. भारत भगवान काळे (वय ५९) यांच्या घराच्या चॅनल गेटचा कडी-कोंडा तोडून अज्ञात चोरट्यांनी घरात प्रवेश केला. कपाटातील तब्बल १२४ ग्रॅम वजनाचे सोन्याचे दागिने आणि ८० हजार रुपये रोख असा एकूण ३ लाख ९८ हजार २५० रुपयांचा मुद्देमाल चोरून नेला. ही घटना २० ते २१ एप्रिलच्या मध्यरात्री घडली. या प्रकरणी कळंब पोलिसांत कलम ३३१(४), ३०५(अ) अन्वये गुन्हा नोंदवण्यात आला आहे.
कळंब : शटर उचकटून दुकानांत चोऱ्या
कळंबमधील डिकसळ (संभाजीनगर) येथील श्रद्धा बॅग हाऊस या दुकानाचे शटर अज्ञात व्यक्तीने उचकटून कॅश काउंटरमधील १५ हजार रुपये रोख रकमेची चोरी केली. चोरट्यांनी एवढ्यावरच न थांबता नगरपरिषद शॉपिंग सेंटरमधील शेजारील मॉडर्न कलेक्शन आणि शिंदे क्लॉथ सेंटर या दोन दुकानांचे कुलूप तोडून चोरीचा प्रयत्न केला. उमाकांत दासराव जगधने (वय ४६) यांच्या फिर्यादीवरून कळंब पोलिसांत कलम ३३१(४), ३०५, ३(५) नुसार गुन्हा दाखल करण्यात आला आहे.
कळंब : घरासमोरून दुचाकी चोरीला
मस्सा (खं.) येथून ओमकार गोकुळ इंगोले (वय २२) यांची ८० हजार रुपये किमतीची काळ्या रंगाची होंडा युनिकॉर्न दुचाकी (क्र. एमएच २५ बीजी ५९९२) अज्ञात चोरट्यांनी घरासमोरून चोरून नेली. ही घटना १६ ते १७ एप्रिलच्या दरम्यान घडली. याप्रकरणी कळंब पोलीस ठाण्यात कलम ३०३(२) अन्वये गुन्हा नोंद आहे.
नळदुर्ग : सव्वा लाखांच्या केबल आणि वायरची चोरी
नळदुर्ग येथील बूरेज क्र. ०१ येथून सप्लाय केबल, पॅनेलमधील तांब्याची वायर आणि एमसीबी असा एकूण १ लाख २० हजार २३६ रुपयांचा माल अज्ञात व्यक्तीने चोरून नेला. ही घटना २२ ते २३ मार्च दरम्यान घडली असून, प्रसाद बळवंतराव कांबळे (वय ४६, रा. तुळजापूर) यांच्या फिर्यादीवरून नळदुर्ग पोलीस ठाण्यात २१ एप्रिल रोजी कलम ३०३(२) नुसार गुन्हा नोंद करण्यात आला आहे.
