धाराशिव : धाराशिव शहरातील एका ज्येष्ठ नागरिकाच्या बँक खात्यातून अज्ञात सायबर भामट्याने परस्पर १ लाख रुपयांची रक्कम काढून ऑनलाइन फसवणूक केल्याचा प्रकार समोर आला आहे. याप्रकरणी धाराशिव सायबर पोलीस ठाण्यात गुन्हा नोंदवण्यात आला आहे.
नेमकी घटना काय?
भानुनगर (सेंट्रल बिल्डिंग, घर नं. ४६४६, धाराशिव) येथील रहिवासी माणिक विठ्ठलराव गरड (वय ६२ वर्षे) यांचे ज्ञानेश्वर मंदिराजवळील कॅनरा बँकेच्या शाखेत खाते आहे. दिनांक ५ ऑगस्ट २०२५ रोजी सकाळी ७.०२ ते ८ ऑगस्ट २०२५ रोजी सकाळी ८.०० वाजेच्या सुमारास अज्ञात व्यक्तीने कोणत्याही पूर्वसूचनेशिवाय त्यांच्या बँक खात्यातून ऑनलाइन पद्धतीने टप्प्याटप्प्याने एकूण १,००,००६ रुपये परस्पर काढून घेतले.आपली आर्थिक फसवणूक झाल्याचे लक्षात आल्यानंतर त्यांनी सायबर पोलिसांकडे तक्रार नोंदवली.
सायबर पोलिसांत गुन्हा नोंद
याप्रकरणी माणिक गरड यांनी दिलेल्या फिर्यादीवरून १९ ऑगस्ट २०२६ रोजी धाराशिव सायबर पोलीस ठाण्यात अज्ञात व्यक्तीविरुद्ध भारतीय न्याय संहिता (BNS) कलम ३१८(४) सह माहिती तंत्रज्ञान कायदा (IT Act) कलम ४३, ६६(सी) आणि ६६(डी) अन्वये फसवणुकीचा गुन्हा दाखल करण्यात आला आहे. सायबर पोलीस या प्रकरणाचा पुढील तपास करत आहेत.
