धाराशिव | धाराशिव जिल्ह्यात महिलांच्या सुरक्षेचा प्रश्न पुन्हा एकदा ऐरणीवर आला आहे. जिल्ह्यात दोन वेगवेगळ्या ठिकाणी महिला आणि अल्पवयीन मुलीवर लैंगिक अत्याचार झाल्याच्या संतापजनक घटना समोर आल्या आहेत. याप्रकरणी आंबी आणि भूम पोलीस ठाण्यात नराधमांविरुद्ध गुन्हे दाखल करण्यात आले असून, पोलीस अधिक तपास करत आहेत.
आंबी: घरात घुसून २७ वर्षीय महिलेवर अत्याचार
आंबी पोलीस ठाण्याच्या हद्दीतील एका गावात ही संतापजनक घटना घडली आहे. दि. १ फेब्रुवारी २०२६ रोजी मध्यरात्रीच्या सुमारास २७ वर्षीय पीडित महिला आपल्या घरी असताना, गावातीलच एका तरुणाने घरात प्रवेश केला. त्याने पीडितेचे दोन्ही हाताचे मनगट घट्ट पकडून तिच्यावर बळजबरीने लैंगिक अत्याचार केला.
या धक्कादायक प्रसंगानंतर पीडित महिलेने धिर एकवटून दि. २ मे २०२६ रोजी पोलीस ठाणे गाठले. पीडितेच्या फिर्यादीवरून आंबी पोलिसांनी आरोपीविरुद्ध भारतीय न्याय संहिता (BNS) कलम ६४(१) अन्वये गुन्हा नोंदवला आहे.
भूम: औषधी आणायला गेलेल्या अल्पवयीन मुलीला गाठले; ‘पोक्सो’ अंतर्गत गुन्हा
दुसरी घटना भूम पोलीस ठाण्याच्या हद्दीत घडली आहे. दि. १ मे २०२६ रोजी रात्री ८ ते १० च्या सुमारास १६ वर्षे ९ महिने वयाची मुलगी मेडिकलमध्ये औषध आणण्यासाठी घराबाहेर पडली होती. यावेळी गावातीलच एका तरुणाने तिला गाठले आणि मोटारसायकलवर बसवून नेले. त्यानंतर तिच्यावर लैंगिक अत्याचार केला.
याप्रकरणी पीडित मुलीच्या आईने दिलेल्या तक्रारीवरून भूम पोलीस ठाण्यात आरोपीविरुद्ध BNS कलम ६४(१), ३५१ (२) सह बाल लैंगिक अत्याचार प्रतिबंधक कायदा (पोक्सो) कलम ४, ८, १२ अन्वये गुन्हा दाखल करण्यात आला आहे.
जिल्ह्यातील या वाढत्या घटनांमुळे संताप व्यक्त होत असून, आरोपींवर कठोर कारवाई करण्याची मागणी नागरिकांमधून केली जात आहे.
