धाराशिव – धाराशिव जिल्ह्यात ऑगस्ट आणि सप्टेंबर महिन्यात झालेल्या अतिवृष्टीमुळे शेतकऱ्यांचे मोठे नुकसान झाले आहे. मात्र, प्रचलित निकषांमुळे अनेक शेतकरी मदतीपासून वंचित राहिले आहेत. याबाबत आमदार राणाजगजितसिंह पाटील यांनी मुख्यमंत्री देवेंद्र फडणवीस यांची भेट घेऊन त्यांच्या निदर्शनास आणून दिले आहे.
जिल्ह्यातील ५७ पैकी ३३ महसूल मंडळात अतिवृष्टीची नोंद झाली असून, एक लाख ८१ हजार शेतकऱ्यांना २२१ कोटी रुपयांची नुकसान भरपाई मंजूर करण्यात आली आहे. मात्र, धाराशिव, भूम, परंडा आणि तुळजापूर तालुक्यातील २४ महसूल मंडळातही मोठ्या प्रमाणात अतिवृष्टी झाली असूनही, प्रचलित निकषांमुळे त्यांची नोंद झाली नाही. त्यामुळे हे शेतकरी मदतीपासून वंचित राहिले आहेत.
आमदार पाटील यांनी मुख्यमंत्र्यांना विनंती केली आहे की, सततच्या पावसाचा निकष शिथिल करून “महसुल मंडळामध्ये सलग पाच दिवसाच्या कालावधीमध्ये सरासरी ५० मिमी किंवा ५० मिमी पेक्षा जास्त पाऊस झाल्यास” असा बदल करावा आणि वस्तुनिष्ठ पंचनाम्याच्या आधारे जिल्ह्यातील उर्वरित महसूल मंडळातील शेतकऱ्यांना मदत करावी.
मुख्यमंत्री फडणवीस यांनी या मागणीला अनुकूलता दर्शविली असून, लवकरच याबाबत निर्णय घेतला जाईल, अशी आशा आहे.
- सदोष पर्जन्यमापकांमुळे अनेक ठिकाणी अतिवृष्टीची नोंद झाली नाही.
- सोयाबीनला बुरशीजन्य रोगाचा प्रादुर्भाव झाल्याने शेतकऱ्यांचे मोठे नुकसान झाले आहे.
- आमदार पाटील यांनी मदतीपासून वंचित शेतकऱ्यांना मदत मिळेपर्यंत पाठपुरावा करण्याचे आश्वासन दिले आहे.
