धाराशिव शहरातील सांजावेस भागात रविवारी (दि.1 सप्टेंबर) रात्री मुसळधार पावसात एक दुर्दैवी घटना घडली. मारुती मंदिराच्या मागील बाजूची भिंत कोसळून श्रीमती अंबिका दत्ता दोडमिसे यांच्या पत्र्याच्या शेडवर आदळली. या दुर्घटनेत शेडमधील 20 शेळ्या-बोकड आणि 65 कोंबड्या मृत्युमुखी पडल्या. तसेच 15 बाय 70 आकाराचे पत्र्याचे शेडही उद्ध्वस्त झाले. यामुळे अंदाजे 5 लाख 50 हजार रुपयांचे नुकसान झाले आहे.
श्रीमती दोडमिसे या विधवा असून त्या वडील वामन दशरथ लोणारी (मोळेकर) यांच्या घरी वास्तव्यास आहेत. त्यांनी बँक ऑफ महाराष्ट्र शाखेतून 2 लाख 50 हजार रुपये कर्ज घेऊन शेळीपालन व कुक्कुटपालन व्यवसाय सुरू केला होता. या दुर्घटनेमुळे त्यांच्यावर आर्थिक संकट कोसळले आहे.
सोमवारी (दि.2 सप्टेंबर) धाराशिव शहरचे तलाठी बालाजी लाकाळ यांनी पंचासमक्ष दुर्घटनेचा पंचनामा करून तहसीलदारांकडे अहवाल सादर केला आहे. नागरिकांकडून श्रीमती दोडमिसे यांना संकटातून सावरण्यासाठी शासनाकडून भरीव मदत मिळावी, अशी मागणी होत आहे.
