धाराशिव: धाराशिव सिटी पोलिसांच्या पथकाने छ. शिवाजी महाराज चौकात मोठी कारवाई करत बेकायदेशीररीत्या दारूची वाहतूक करणारी गाडी पकडली आहे. या कारवाईत पोलिसांनी देशी-विदेशी दारू आणि महिंद्रा बोलेरो जीप असा एकूण ६,०७,०९५ रुपयांचा मुद्देमाल जप्त केला आहे.
रविवार, दिनांक ०३ मे २०२६ रोजी दुपारी १२:३० च्या सुमारास ही घटना घडली. सविस्तर माहितीनुसार, पोलीस नाईक रमाकांत मधुकर जगताप आणि सपोनि अंभोरे हे नेट परीक्षेच्या बंदोबस्तासाठी गस्तीवर असताना डॉ. बाबासाहेब आंबेडकर चौकात त्यांना एका गुप्त बातमीदारामार्फत खबर मिळाली होती. एक व्यक्ती पांढरा शर्ट आणि काळी पँट घालून आपल्या ताब्यातील महिंद्रा बोलेरो जीप (MH13DT5924) मध्ये देशी-विदेशी दारूची चोरटी विक्री करण्यासाठी छ. शिवाजी महाराज चौकातून बार्शी रोडने जाणार असल्याची खात्रीलायक माहिती पोलिसांना मिळाली.
या माहितीच्या आधारे सपोनि अंभोरे यांनी दोन पंचांना बोलावून घेत देवगुडे यांच्या किराणा दुकानासमोर, छ. शिवाजी महाराज चौक येथे सापळा रचला. संशयित जीप तिथे येताच पोलिसांनी ती थांबवून तिची तपासणी केली असता, गाडीमध्ये ट्यूबर्ग बिअर, टॅंगो पंच, इम्पिरियल ब्ल्यू, क्लासिक गोल्ड, रॉयल स्टॅग, ओल्ड मंक आणि रॉयल चॅलेंज अशा विविध कंपन्यांच्या दारूच्या सीलबंद बाटल्या आढळून आल्या. जप्त करण्यात आलेल्या दारूची एकूण किंमत ७,०९५ रुपये आहे. त्याचबरोबर गुन्ह्यात वापरलेली ६,००,००० रुपये किमतीची महिंद्रा बोलेरो निओ जीप देखील पोलिसांनी जप्त केली आहे.
या प्रकरणी आरोपी सतीश रामभाऊ शिंदे (वय ४५, रा. नारीवाडी, ता. बार्शी, जि. सोलापूर) याच्याविरुद्ध विनापरवाना बेकायदेशीररीत्या दारूची चोरटी विक्री करण्याच्या उद्देशाने वाहतूक केल्याचा ठपका ठेवण्यात आला आहे. आरोपीविरुद्ध धाराशिव सिटी पोलीस ठाण्यात महाराष्ट्र दारूबंदी अधिनियम १९४९ च्या कलम ६५ (ई) अन्वये प्रथम खबर अहवाल (गुन्हा क्र. ०१७३) दाखल करण्यात आला आहे. या गुन्ह्याचा पुढील तपास सहायक फौजदार गजानन खंडोजी करहाळे हे करत आहेत.
