धाराशिव: शहरातील जुना उपळा रोडवर असलेल्या जीवघेण्या खड्ड्याकडे प्रशासनाचे आणि गुत्तेदाराचे (कंत्राटदार) लक्ष वेधण्यासाठी धाराशिवमधील सजग नागरिकांनी एक अनोखे आणि संतापजनक आंदोलन छेडले आहे. “या खड्ड्यात पडायला या, मला अजून एक बळी पाहिजे…” अशा आशयाचे होर्डिंग लावून नागरिकांनी गुत्तेदाराच्या ढिसाळ कारभाराचा तीव्र निषेध नोंदवला आहे.
नेमका प्रकार काय?
जुना उपळा रोड येथे सर्व्हिस रोड संपताच एक ५ ते ६ फूट खोल खड्डा आहे. या खड्ड्यावर स्लॅब न टाकता तो तसाच उघडा सोडण्यात आला आहे. रात्रीच्या वेळी किंवा वर्दळीच्या वेळी येथे अपघात होऊन मोठी दुर्घटना होण्याची दाट शक्यता निर्माण झाली आहे.
दीड वर्षांपूर्वी झाला होता विद्यार्थ्याचा मृत्यू
या रस्त्यावरील अपघातांचा इतिहास अतिशय गंभीर आहे. मागील दीड वर्षांपूर्वी याच भागात पोदार शाळेतील एका निष्पाप विद्यार्थ्याचा अपघाती मृत्यू झाला होता. या दुर्दैवी घटनेनंतर नागरिकांनी रस्त्यावर उतरून तीव्र ‘रस्ता रोको’ आंदोलन केले होते. मात्र, प्रशासनाने यातून कोणताही धडा घेतला नसल्याचे चित्र आहे. खड्डा उघडाच असल्याने पुन्हा एकदा तशाच घटनेची पुनरावृत्ती होण्याची भीती नागरिक व्यक्त करत आहेत.
होर्डिंगवरील लक्षवेधी आणि उपहासात्मक मजकूर
प्रशासन आणि गुत्तेदाराला जाग आणण्यासाठी खड्ड्याच्या ठिकाणी एक लक्षवेधी होर्डिंग लावण्यात आले आहे. त्यावर लिहिलंय:
“या या माझ्याकडे या, खड्ड्यात पडायला या. मला अजून एक बळी पाहिजे, त्याशिवाय माझे समाधान होणार नाही. – आपलाच धाराशिवचा लाडका गुत्तेदार”
हा होर्डिंग सध्या शहरात चर्चेचा विषय ठरला असून, गुत्तेदार अजून किती अपूर्ण कामे ठेवून नागरिकांचे बळी घेणार? असा संतप्त सवाल नागरिकांमधून विचारला जात आहे.
नागरिकांचा १५ दिवसांचा अल्टीमेटम
प्रशासनाने आणि संबंधित गुत्तेदाराने या समस्येकडे त्वरित लक्ष न दिल्यास जनआंदोलन छेडण्याचा इशारा देण्यात आला आहे. “जर येत्या १५ दिवसांत हा रस्ता आणि खड्डा दुरुस्त केला नाही, तर जेसीबीच्या साहाय्याने सर्व्हिस रोड फोडून टाकू,” असा थेट इशारा ‘सजग नागरिक धाराशिव’ यांच्या वतीने देण्यात आला आहे. आता प्रशासन या इशाऱ्याची दखल घेऊन वेळेत कारवाई करणार का, हे पाहणे महत्त्वाचे ठरणार आहे.
