धाराशिव – धाराशिव जिल्ह्यातील येरमाळा व वाशी परिसरातील पवनचक्कीच्या नवीन विद्युत वाहिन्यांच्या तारा चोरणाऱ्या एका आंतरजिल्हा टोळीच्या धाराशिव स्थानिक गुन्हे शाखेने (LCB) मुसक्या आवळल्या आहेत. मांडवा शिवारात मध्यरात्री छापा टाकून ५ चोरट्यांसह धाराशिव शहरातील एका भंगार खरेदीदाराला ताब्यात घेण्यात आले आहे. या कारवाईत पोलिसांनी पिकअप, दोन मोटारसायकली, तांब्याची व ॲल्युमिनियमची तार असा एकूण ११ लाख ५३ हजार रुपयांचा मुद्देमाल जप्त केला असून, येरमाळा पोलीस ठाण्यातील ४ गुन्हे एकाच वेळी उघडकीस आले आहेत.
मांडवा शिवारात मध्यरात्री एलसीबीचा छापा
स्थानिक गुन्हे शाखेचे पथक ५ ऑक्टोबर २०२६ रोजी मालाविषयक गुन्हे उघडकीस आणण्यासाठी गस्त घालत होते. यावेळी पथकाला गोपनीय बातमीदाराकडून खात्रीलायक माहिती मिळाली की, मांडवा शिवारात शाम अजिनाथ शिंदे व त्याचे साथीदार पवनचक्कीवरून चोरून आणलेली नवीन विद्युत वाहिनीची ॲल्युमिनियम तार एका पिकअपमध्ये भरत आहेत.
माहिती मिळताच पोलीस निरीक्षक विनोद इज्जपवार यांच्या आदेशाने पथकाने तत्काळ मांडवा शिवारात धाव घेतली. तेथे एक पिकअप व दोन मोटारसायकली उभ्या असल्याचे दिसले, तसेच ८ ते १० इसम पिकअपमध्ये तारांचे बंडल भरत असल्याचे नजरेस पडले. पोलिसांनी दबा धरून पायी चालत घेराव घालण्याचा प्रयत्न केला असता संशयित पळून जाऊ लागले. पथकाने पाठलाग करून ५ जणांना जागीच शिताफीने पकडले, तर अंधाराचा फायदा घेऊन ४ जण पसार झाले.
पकडण्यात आलेले आरोपी: १) शाम अजिनाथ शिंदे (वय २६ वर्षे, रा. मांडवा, जि. धाराशिव)
२) लाला गोविंद पवार (वय २४ वर्षे, रा. जुनी दूध डेअरी, धाराशिव; ह.मु. मांडवा)
३) आकाश श्रीरंग पवार (रा. वरूडा, ता. जि. धाराशिव)
४) पवन कालीदास काळे (वय २२ वर्षे, रा. वरूडा, ता. जि. धाराशिव)
५) पिकअप चालक: अंगद प्रल्हाद शिंदे (वय ३२ वर्षे, रा. घोसापुरी, ता. जि. बीड)
धाराशिव शहरातून भंगार खरेदीदारही गजाआड
ताब्यातील आरोपींकडे कसून चौकशी केली असता, त्यांनी या तारा तेरखेडा, इंदापूर आणि ढोकी शिवारातील पवनचक्कींच्या नवीन पोलवरील लाईन कट करून चोरून आणल्याची कबुली दिली. आरोपी आकाश पवार याने अधिक माहिती देताना धाराशिव शहरातील भंगार व्यावसायिक जाकेर निजाम शेख याला यापूर्वी मोठ्या प्रमाणावर चोरीच्या तारा विकल्याचे सांगितले.
त्यावरून पथकाने तत्काळ धाराशिव शहरात छापा टाकून जाकेर निजाम शेख यालाही ताब्यात घेतले. त्याने चोरीच्या तारा खरेदी केल्याचे मान्य केले आहे.
नळदुर्गच्या दरोड्यातील फरार आरोपीही जाळ्यात
मुख्य आरोपी शाम अजिनाथ शिंदे हा नळदुर्ग पोलीस ठाण्यात दाखल असलेल्या दरोड्याच्या गुन्ह्यातील फरार आरोपी असल्याचे निष्पन्न झाले आहे. पोलिसांनी आरोपींकडून चोरीची ॲल्युमिनियम व तांब्याची तार, एक महिंद्रा पिकअप आणि दोन मोटारसायकली असा एकूण ११ लाख ५३ हजार रुपयांचा मुद्देमाल जप्त केला असून, सर्व आरोपींना पुढील कारवाईसाठी येरमाळा पोलीस ठाण्याच्या स्वाधीन केले आहे.
पोलीस पथकाची दमदार कारवाई
ही धडक कारवाई जिल्हा पोलीस अधीक्षक श्रीमती रितू खोखर व अपर पोलीस अधीक्षक सचिन पांडकर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सपोनि सचिन खटके, पोलीस हवालदार विनोद जानराव, नितीन जाधवर, बबन जाधवर, क्युआरटी (QRT) पथकाचे आदित्य बालवाड, रितेश चारले, महेश खरात तसेच चालक पोलीस हवालदार महेबुब अरब, सुभाष चौरे, रोहित दंडनाईक आणि प्रकाश बोईनवाड यांच्या पथकाने यशस्वीरीत्या पार पाडली.
