धाराशिव- धाराशिव (उस्मानाबाद) लोकसभा मतदारसंघातील ओबीसी बहुजन पार्टीचे अधिकृत उमेदवार अर्जुन सलगर यांनी सोमवारी (दि.15) नामनिर्देशनपत्र दाखल केले.
यावेळी सचिन शेंडगे, अरुण जाधवर, श्रीमती सुहासिनी पाटील, अॅड.वाघमारे, बालाजी शिंगे, उमेश काळे, सुनील कानडे, रमाकांत लकडे, गणेश एडके, मच्छिंद्र सारुक, ज्ञानेश्वर पंडित, अक्षय माने आदींची प्रमुख उपस्थिती होती. उमेदवारी अर्ज दाखल केल्यानंतर माध्यमांशी बोलताना ते म्हणाले की, धाराशिव जिल्ह्याचे कायमस्वरुपी दुष्काळ निवारण करण्यासाठी नदीजोड प्रकल्प इथे राबविण्यासाठी ही निवडणूक आपण लढवित आहोत. त्याचबरोबर महाराष्ट्रातील धनगर समाजाच्या एसटी आरक्षणाच्या अंमलबजावणी, बेरोजगारीचा प्रश्न सोडविण्यासाठी धाराशिव जिल्ह्यात एमआयडीसीचा विकास करण्यासाठी काम करणार असून जनता आपल्या पाठीशी असल्यामुळे सर्वाधिक मताधिक्य आपणाला मिळणार असल्याचेही ते म्हणाले.
विश्व शक्ति पार्टीचे नवनाथ दुधाळ यांचा उमेदवारी अर्ज दाखल
धाराशिव (उस्मानाबाद) लोकसभा मतदारसंघातील विश्व शक्ति पार्टीचे उमेदवार नवनाथ दुधाळ यांनी सोमवारी (दि.15) उमेदवारी अर्ज दाखल केला. उमेदवारी अर्ज दाखल केल्यानंतर त्यांनी शहरातून धाराशिव शहरातून भव्य रॅली काढली. देशातील सामाजिक क्षेत्रात काम करणार्या विविध 50 संघटनांनी एकत्र येऊन विश्व शक्ति पार्टीची स्थापना केली असून या पक्षाने महाराष्ट्रातून श्री.दुधाळ यांची पहिली उमेदवारी जाहीर केलेली आहे.
उमेदवारी अर्ज दाखल केल्यानंतर शहरातील छत्रपती शिवाजी महाराज चौक येथे शिवरायांना अभिवादन करुन रॅलीला सुरुवात झाली. त्यानंतर महामानव डॉ.बाबासाहेब आंबेडकर, महात्मा जोतीराव फुले यांच्या पुतळ्यास अभिवादन केले. रॅलीमध्ये घोडागाडी आणि शेणाचा लेप दिलेल्या कारने नागरिकांचे लक्ष वेधून घेतले.
यावेळी यावेळी विश्व शक्ति पार्टीचे राष्ट्रीय महासचिव डॉ.अभय छेडा, स्वदेशी सेनेचे राष्ट्रीय अध्यक्ष प्रोफेसर मदन दुबे, दत्तात्रय क्षिरसागर, यांच्यासह दुधाळवाडी, अवधूतवाडी, गौर, रत्नापूर, येरमाळा, दहिफळ व जिल्ह्यातील गोसेवक उपस्थित होते.
