धाराशिव : महिलेच्या अंगावर रॉकेल ओतून जिवंत जाळणाऱ्या नराधमास जन्मठेप

धाराशिव: लिव्ह-इन रिलेशनशिपमध्ये राहणाऱ्या महिलेच्या अंगावर रॉकेल ओतून तिला जिवे मारणाऱ्या आरोपीस धाराशिव जिल्हा व सत्र न्यायालयाने जन्मठेप आणि २५,००० रुपये दंडाची शिक्षा सुनावली आहे. दशरथ मुरलिधर सरवदे (वय ३५, रा. जुनोनी, ता. जि. धाराशिव) असे शिक्षा झालेल्या आरोपीचे नाव आहे.

नेमकी घटना काय?

मयत फिर्यादी निता शशीकांत विधाते (वय ३५) आणि आरोपी दशरथ यांची ओळख झाल्यानंतर ते काही महिने एकत्र राहिले होते. मात्र, आरोपीने फिर्यादीस त्रास देण्यास सुरुवात केली. दिनांक २६ मार्च २०१७ रोजी रात्री जेवण झाल्यानंतर आरोपीने फिर्यादीसोबत भांडण केले आणि तिच्या अंगावर रॉकेल ओतून तिला काडीने पेटवून दिले.

फिर्यादीचा आरडाओरडा ऐकून तिचा मुलगा सुजित याने आईला वाचवण्यासाठी बकेटने पाणी ओतले असता, तेथे उपस्थित असलेल्या आरोपीच्या आई, मावशी आणि आजीने त्याला “तिला विझवू नको, मरु दे,” असे म्हणत मदत करण्यास नकार दिला. त्यानंतर जखमी अवस्थेत निता यांना जिल्हा रुग्णालयात दाखल करण्यात आले, जिथे उपचारादरम्यान त्यांचा मृत्यू झाला.

व्हिडिओ रेकॉर्डिंग ठरले महत्त्वाचा पुरावा

या प्रकरणाचा तपास पोलीस उपनिरीक्षक संग्राम उध्दवराव जाधव यांनी केला. तपासादरम्यान त्यांनी पीडितेचा जबाब मोबाईल कॅमेऱ्याद्वारे व्हिडिओ रेकॉर्डिंग स्वरूपात नोंदवला होता, जो या खटल्यात अत्यंत महत्त्वाचा पुरावा ठरला. तसेच नायब तहसीलदारांनी नोंदवलेला मृत्यूपूर्व जबाब आणि न्यायवैज्ञानिक प्रयोगशाळेच्या अहवालात आरोपीच्या कपड्यांवर आढळलेले रॉकेलचे अंश हे पुरावे ग्राह्य धरण्यात आले.

न्यायालयाचा निकाल

सरकार पक्षातर्फे अतिरिक्त शासकीय अभियोक्ता सचिन एस. सुर्यवंशी यांनी एकूण १३ साक्षीदार तपासले आणि जोरदार युक्तिवाद केला. हा युक्तिवाद आणि पुरावे ग्राह्य धरून  प्रमुख जिल्हा व सत्र न्यायाधीश श्रीमती अभिश्री डी. देव यांनी आरोपी दशरथ सरवदे याला कलम ३०२ अन्वये दोषी ठरवून जन्मठेपेची शिक्षा सुनावली.

या गुन्ह्यातील इतर तीन महिला आरोपींची (आरोपीची आई, मावशी आणि आजी) सबळ पुराव्याअभावी निर्दोष मुक्तता करण्यात आली. या खटल्यात पैरवी अधिकारी म्हणून महिला पोलीस नाईक पी. एस. तेलप-साठे यांनी काम पाहिले.

महत्वाचे मुद्दे:

• आरोपी: दशरथ मुरलीधर सरवदे (शिक्षा: जन्मठेप व २५ हजार दंड).

• न्यायाधीश: श्रीमती अभिश्री डी. देव (प्रमुख जिल्हा व सत्र न्यायाधीश).

• सरकारी वकील: ॲड. सचिन एस. सूर्यवंशी.

• तपास अधिकारी: पो.उ.नि. संग्राम जाधव.