वर्तमानपत्राच्या मथळ्यावर नजर टाकली की अंगावर काटा येतो—‘धाराशिववर पाणीबाणी, उरला अवघा ६ टक्क्यांपेक्षा कमी साठा!’ प्रकल्पांचे तळ कोरडे पडलेत, घशाला कोरड पडलीये आणि पाण्याचे दुर्भिक्ष डोक्यावर तांडव करतंय। अशा गंभीर परिस्थितीत जनतेला ठोस दिलासा देण्याऐवजी आपले ‘फेसबुक पिंट्या’ पत्रकार परिषदा घेऊन आणि सोशल मीडियावर लांबलचक पोस्ट ठोकून जनतेलाच सल्ले वाटतायत—“पाणी जपून वापरा, तापमान वाढले आहे!” वा रे वा शहाणपण! स्वतःच्या अपयशाचे खापर आता थेट सूर्याच्या तापमानावर फोडायचे उद्योग पिंट्यांनी सुरू केले आहेत।
डिसेंबर २०२४ चे ते ‘कृष्णा खोऱ्याचे’ पाणी गेले कुठे?
फेसबुकवर रोज विकासाच्या बाता मारणाऱ्या पिंट्याला आता धाराशिवकरांनी थेट सवाल विचारला पाहिजे. प्रत्येक निवडणुकीत, प्रत्येक भाषणात आणि सोशल मीडियाच्या प्रत्येक पोस्टमध्ये याच पिंट्याने गळे काढून सांगितले होते—“डिसेंबर २०२४ पर्यंत कृष्णा खोऱ्याचे पाणी थेट धाराशिवच्या मातीत खेळवणार!”
पण आज वस्तुस्थिती काय आहे? आज धरणे कोरडीठाक पडली आहेत, जिल्ह्यात पावसाची ६२ टक्क्यांची प्रचंड तूट झाली आहे आणि उपयुक्त जलसाठा ६ टक्क्यांच्या खाली घसरला आहे। मग त्या कृष्णा खोऱ्याच्या पाण्याचं नक्की काय झालं? ते पाणी पाईपलाईनमधून आले की पिंट्याच्या फेसबुक पोस्टमध्येच मुरले? त्या भुलथापांचे काय झाले, हे आज विचारण्याची हिंमत ना पिंट्यामध्ये आहे, ना त्यांच्या भाडोत्री कार्यकर्त्यांमध्ये!
४० वर्षे सत्ता हातात, तरीही जिल्ह्याच्या कपाळावर ‘दुष्काळी’ शिक्काच!
गेली चाळीस वर्षे सत्तेची सर्व फळे या घराण्याने चाखली. मिनी मंत्रालयापासून ते राज्याच्या सत्तेपर्यंत सगळी पदे यांच्याच घरात राहिली. पण या चार दशकांत जिल्ह्याचा पाण्याचा प्रश्न कायमचा मिटावा म्हणून कोणती दूरदृष्टी दाखवली?
-
ना पाण्याचे कायमस्वरूपी नियोजन झाले,
-
ना सिंचनाचे प्रकल्प वेळेत पूर्ण झाले,
-
उलट धाराशिवच्या कपाळावर ‘कायमचा दुष्काळी जिल्हा’ असा शिक्का मात्र या घराण्याच्या नाकर्तेपणामुळे पक्का कोरला गेला!
४० वर्षे स्वतःच्या घरात सत्ता असताना काही केले नाही, आणि आता जेव्हा जलसाठा आटून ६ टक्क्यांवर आला, तेव्हा हे महाशय १ टीएमसी पाण्यासाठी उजनीकडे हात पसरून त्याचे श्रेय लाटायला पुढे सरसावले आहेत!
स्वतःचे हात कोरडे आणि काम शून्य असताना, पत्रकार परिषदेत बसून “पाणी जपून वापरा” असा उपदेश जनतेला पाजळायचा—याला म्हणतात चोराच्या उलट्या बोंबा! पिंट्याजी, जनतेने पिढ्यानपिढ्या पाणी काटकसरीनेच वापरले आहे; पण तुम्ही मात्र गेली ४० वर्षे सत्तेची मलई बिनधास्तपणे लाटली.
डिसेंबर २०२४ च्या त्या ‘कृष्णा खोऱ्या’च्या हवेतील गप्पा आता धाराशिवकरांच्या चांगल्याच लक्षात आल्या आहेत. फेसबुकवर पाण्याचे फोटो टाकून तहान भागत नसते, आणि पोकळ दाव्यांनी दुष्काळ हटत नसतो. ४० वर्षांच्या सत्ताभोगानंतरही जनतेला पाण्यासाठी वणवण भटकायला लावणारे हे ‘फेसबुकी भगीरथ’ आता उघडे पडले आहेत, आणि जनता या पाणीबाणीचा हिशोब नक्कीच चुकता करणार!
