परंडा : एटीएममधून पैसे काढण्यासाठी गेलेल्या तरुणाचे एटीएम कार्ड हातचलाकीने बदलून, त्याच्या खात्यातून ५० हजार रुपये काढून घेतल्याची धक्कादायक घटना परंडा शहरात घडली आहे. याप्रकरणी पिठापुरी (ता. परंडा) येथील तरुणाने दिलेल्या तक्रारीवरून परंडा पोलीस ठाण्यात अज्ञात चोरट्यांविरुद्ध गुन्हा दाखल करण्यात आला आहे.
मिळालेल्या माहितीनुसार, धनाजी तात्याबा लेंगरे (वय ३२, रा. पिठापुरी, ता. परंडा, जि. धाराशिव) हे ३० एप्रिल २०२६ रोजी दुपारी साडेचार वाजेच्या सुमारास परंडा येथील आयसीआयसीआय (ICICI) बँकेच्या एटीएममध्ये पैसे काढण्यासाठी गेले होते. यावेळी तेथे दबा धरून बसलेल्या एका अज्ञात इसमाने मदतीचा बहाणा करत किंवा नजर चुकवून धनाजी यांचे एटीएम कार्ड हातचलाकीने बदलले.
अशी झाली फसवणूक
धनाजी यांना आपले कार्ड बदलले गेल्याचा संशय आला नाही. मात्र, त्यानंतर काही वेळातच त्यांच्या बँक खात्यातून ५० हजार रुपये काढले गेल्याचे समोर आले. आपली फसवणूक झाल्याचे लक्षात येताच त्यांनी बँकेत धाव घेतली. या घटनेनंतर धनाजी लेंगरे यांनी बुधवारी (दि. १३ मे) परंडा पोलीस ठाण्यात धाव घेऊन तक्रार दिली.
पोलीसांत गुन्हा दाखल
धनाजी लेंगरे यांच्या फिर्यादीवरून परंडा पोलिसांनी अज्ञात इसमाविरुद्ध भारतीय न्याय संहिता (BNS) कलम ३१८(४) आणि ३(५) अन्वये गुन्हा नोंदवला आहे. एटीएम केंद्रातील सीसीटीव्ही फुटेजच्या आधारे पोलीस आता आरोपीचा शोध घेत आहेत.
सावधानता बाळगा!
एटीएममध्ये पैसे काढताना कोणाचीही मदत घेऊ नका. आपला पिन क्रमांक कोणालाही दिसणार नाही याची काळजी घ्या आणि कार्ड परत घेताना ते आपलेच आहे का, याची खात्री करा, असे आवाहन पोलीस प्रशासनाकडून करण्यात आले आहे.
