धाराशिव : महाराष्ट्र शासनाने प्रतिबंधित केलेला सुगंधी गुटखा आणि तंबाखूची विक्री करण्यासाठी जात असलेल्या एका इसमाला धाराशिव शहर पोलिसांनी रंगेहाथ पकडले. वैराग नाका परिसरात रविवारी (दि. ३१ मे) दुपारी करण्यात आलेल्या या कारवाईत गुटखा आणि दुचाकीसह एकूण ५८ हजार ४०० रुपयांचा मुद्देमाल जप्त करण्यात आला आहे.
याप्रकरणी मनोज प्रभाकर जाधव (वय ४४, रा. चिलवडी, ता. जि. धाराशिव) याच्याविरुद्ध धाराशिव शहर पोलीस ठाण्यात गुन्हा दाखल करण्यात आला आहे.
नेमकी घटना काय?
धाराशिव शहर पोलीस ठाण्याचे पथक रविवारी दुपारी गस्त घालत असताना, त्यांना वैराग नाका परिसरात एक संशयित इसम दुचाकीवरून जात असल्याची माहिती मिळाली. दुपारी साडेतीन वाजेच्या सुमारास पोलिसांनी मनोज जाधव याला अडवून त्याची झडती घेतली. यावेळी त्याच्याकडे शासनाने प्रतिबंधित केलेला ‘बादशाहा’ नावाचा गुटखा आणि तंबाखू जर्द्याचे आठ पाकिटे मिळून आली.
पोलिसांनी या कारवाईत प्रतिबंधित गुटखा आणि गुटख्याची वाहतूक करण्यासाठी वापरलेली हिरो कंपनीची एच.एफ. डिलक्स मोटरसायकल (क्रमांक: MH 25 AM 2821) असा एकूण ५८ हजार ४०० रुपयांचा माल जप्त केला आहे.
याप्रकरणी पोलिसांनी मनोज जाधव याच्याविरुद्ध भारतीय न्याय संहिता (BNS) कलम १२३, २२३, २७४, २७५ सह अन्न सुरक्षा व मानके कायदा कलम ५९ अन्वये गुन्हा नोंदवला आहे. जिल्ह्यात छुप्या मार्गाने होणाऱ्या गुटखा विक्रीवर पोलिसांनी लक्ष केंद्रित केले असून, अशा अवैध धंद्यांविरुद्ध कठोर कारवाईचा बडगा उगारला आहे.
