धाराशिव जिल्ह्यात गुन्हेगारीच्या घटनांमध्ये वाढ होत असून, उमरगा आणि लोहारा तालुक्यात जबरी चोरी आणि घरफोडीच्या तीन वेगवेगळ्या घटना समोर आल्या आहेत. उमरग्यात दोन जणांना बेदम मारहाण करून लुटण्यात आले आहे, तर लोहारा तालुक्यात अज्ञात चोरट्याने घराच्या गच्चीवरून आत प्रवेश करत तब्बल एक लाख बेचाळीस हजारांचा ऐवज लंपास केला आहे. याप्रकरणी संबंधित पोलीस ठाण्यांमध्ये गुन्हे दाखल करण्यात आले आहेत.
तरुणाला स्कुटीवरून नेत बेदम मारहाण आणि मोबाईलची लूट
उमरगा शहरातील पतंगे रोडवर राहणारे आकाश भगवान इंडे (वय २६) हे ५ मार्च रोजी रात्री साडे नऊ वाजेच्या सुमारास उमरगा-कोरेगाव रोडवरील पाटील यांच्या प्लॉटिंगजवळ होते. यावेळी चार अनोळखी इसमांनी त्यांना बळजबरीने एका ॲक्टिव्हा स्कुटीवर बसवून नेले. चिंचेच्या झाडाखाली नेऊन या चारही जणांनी आकाश यांना लाथाबुक्क्यांनी, दगडाने, काठी, बेल्ट आणि लोखंडी रॉडने बेदम मारहाण केली. पैशांची मागणी करत आरोपींनी त्यांच्याजवळील ‘ओप्पो रेनो ११’ हा मोबाईल बळजबरीने हिसकावून घेतला आणि ‘पोलिसांत तक्रार दिली तर जिवंत सोडणार नाही’, अशी धमकी देऊन आरोपी पसार झाले. याप्रकरणी आकाश इंडे यांनी ६ मार्च रोजी दिलेल्या फिर्यादीवरून उमरगा पोलीस ठाण्यात चार अज्ञात आरोपींविरुद्ध भा.न्या.सं. (BNS) कलम ३०९(४) अन्वये गुन्हा दाखल करण्यात आला आहे.
‘बसस्टँडवर सोडतो’ म्हणत प्रवाशाला लुटले
उमरगा येथीलच दुसऱ्या एका घटनेत, कोळसूर (क) येथील लक्ष्मण जनार्धन चंडकापुरे (वय ४८) यांना लुटण्यात आले. ४ मार्च रोजी पहाटे ३ वाजेच्या सुमारास ते दत्ता मंदिराजवळून पायी जात होते. यावेळी बुलेटवरून (ट्रिपल सीट) आलेल्या तीन अनोळखी तरुणांनी ‘तुम्हाला बसस्टँडवर सोडतो’ असे सांगून लक्ष्मण यांना बुलेटवर बसवले. मात्र, बसस्टँडला न नेता कोरेगाव रोडवरील एसटी बस डेपोच्या पाठीमागे नेऊन त्यांना लाथाबुक्क्यांनी मारहाण केली. त्यांच्या खिशातील रोख रक्कम आणि मोबाईल असा एकूण २५,००० रुपयांचा मुद्देमाल हिसकावून घेत आरोपी बुलेटवरून पसार झाले. लक्ष्मण चंडकापुरे यांच्या फिर्यादीवरून उमरगा पोलिसांत ६ मार्च रोजी भा.न्या.सं. कलम ३०९(९) अन्वये गुन्हा नोंदवण्यात आला आहे.
गच्चीवरून घरात प्रवेश करत सव्वा लाखांची घरफोडी
लोहारा तालुक्यातील धानोरी येथे घरफोडीची मोठी घटना घडली आहे. आनंदराव शाहुराज सूर्यवंशी (वय ५७, रा. धानोरी) यांच्या घरात ५ मार्च रोजी पहाटे पावणे तीन वाजेच्या सुमारास अज्ञात चोरट्याने गच्चीवरील दरवाजातून प्रवेश केला. घरात शिरून चोरट्याने कपाटातील १ लाख ३५ हजार रुपये रोख आणि ‘पोको’ (Poco) कंपनीचा मोबाईल असा एकूण १ लाख ४२ हजार रुपयांचा मुद्देमाल चोरून नेला. आनंदराव सूर्यवंशी यांनी दिलेल्या फिर्यादीनुसार, ६ मार्च रोजी लोहारा पोलीस ठाण्यात अज्ञात चोरट्याविरुद्ध भा.न्या.सं. कलम ३०५(अ) आणि ३(५) अन्वये गुन्हा नोंदवण्यात आला आहे.
