धाराशिव : अपत्य जन्मल्याची माहिती लपवण्याच्या उद्देशाने, जन्मजात मृत अवस्थेत जन्मलेल्या स्त्री जातीच्या अर्भकाला कचऱ्याच्या निळ्या रंगाच्या प्लास्टिक पिशवीत टाकून त्याची अयोग्य प्रकारे विल्हेवाट लावल्याचा संतापजनक प्रकार धाराशिव शहरात उघडकीस आला आहे. या प्रकरणी एका ४० वर्षीय महिलेवर आनंदनगर पोलीस ठाण्यात गुन्हा दाखल करण्यात आला आहे.
सुनीता प्रज्योत उंदरे (वय ४०, रा. वाशी, ता. वाशी, जि. धाराशिव) असे गुन्हा दाखल झालेल्या आरोपी महिलेचे नाव आहे.
पोलिसांनी दिलेल्या माहितीनुसार, ९ ऑक्टोबर २०२५ रोजी मध्यरात्री १२.२४ वाजेच्या सुमारास धाराशिव येथील जिल्हा स्त्री रुग्णालयात हा प्रकार घडला. आरोपी महिलेने जन्मलेल्या मृत स्त्री अर्भकावर योग्य पद्धतीने अंत्यसंस्कार करणे अपेक्षित होते. मात्र, अपत्य जन्माची कोणालाही माहिती होऊ नये आणि त्याची लपवणूक व्हावी, या उद्देशाने तिने या अर्भकास रुग्णालयातील कचरा टाकण्यासाठी असलेल्या निळ्या रंगाच्या पॉलिथिन बॅगमध्ये टाकून दिले.
या धक्कादायक प्रकाराची माहिती मिळाल्यानंतर पोलिसांकडून कायदेशीर कार्यवाही करण्यात आली. याप्रकरणी आनंदनगर पोलीस ठाण्याचे पोलीस उपनिरीक्षक सत्यवान लक्ष्मण आगरकर यांनी दिलेल्या प्रथम खबरीवरून (फिर्यादीवरून) शुक्रवारी (ता. १७ एप्रिल २०२६) आरोपी सुनीता उंदरे हिच्याविरुद्ध भा.दं.सं. कलम ९४ अन्वये गुन्हा नोंदवण्यात आला आहे. या घटनेमुळे वैद्यकीय वर्तुळात व शहरात खळबळ उडाली असून, आनंदनगर पोलीस या प्रकरणाचा पुढील तपास करत आहेत.
