धाराशिव : जिल्ह्यातील डिकसळ पाटीजवळ झालेल्या जबरी चोरीप्रकरणी दोन आरोपींना स्थानिक गुन्हे शाखेच्या पथकाने ताब्यात घेतले आहे. स्थानिक गुन्हे शाखेचे सहाय्यक पोलीस निरीक्षक सुदर्शन कासार आणि त्यांच्या पथकाने ही कारवाई केली.
दिनांक 26 मार्च 2025 रोजी स्थानिक गुन्हे शाखेचे सपोनि कासार आणि त्यांचे पथक धाराशिव जिल्ह्यातील अभिलेखा वरील गुन्हे उघडकीस आणण्यासाठी रवाना झाले होते. त्यांना गोपनीय माहिती मिळाली की, पोलीस ठाणे कळंब हद्दीत डिकसळ पाटी जवळील जबरी चोरीतील आरोपी कळंब पारधी पिढी येथे आहेत.
तात्काळ कारवाई करत स्थानिक गुन्हे शाखेच्या पथकाने संशयित आरोपी लल्ल्या उर्फ अनिल बादल शिंदे (रा. मोहा पारधी पिढी कळंब) आणि मिर्च्या उर्फ आकाश रवि काळे (रा. कळंब पारधी पिढी कळंब) यांना ताब्यात घेतले. चौकशीत त्यांनी डिकसळ पाटीजवळ एका पती-पत्नीला आडवून सोन्याचे दागिने लुटल्याची कबुली दिली.
तपासादरम्यान आरोपींनी चोरी केलेला मुद्देमाल साथीदार गंगाराम बापू पवार याच्या मदतीने केज येथील सोनाली काळे या बहिणीकडे सुपूर्द केला होता. सोनालीने तो मुद्देमाल केज येथील एका सोनाराला विकला होता. पोलीस पथकाने केज येथे जाऊन सोन्याचे कर्णफुले, मंगळसूत्र, मणी असे एकूण 4.5 ग्रॅम वजनाचे आणि 27,000 रुपये किंमतीचे सोन्याचे दागिने जप्त केले.
चौकशीत आरोपींनी युसुफवडगाव (जि. बीड) येथे देखील जबरी चोरी केल्याचे उघड झाले. जप्त मुद्देमाल आणि ताब्यात घेतलेले आरोपी पुढील कार्यवाहीसाठी कळंब पोलीस ठाण्याच्या ताब्यात देण्यात आले आहेत.
सदरची कामगिरी पोलीस अधीक्षक संजय जाधव, अपर पोलीस अधीक्षक शफकत आमना यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सहाय्यक पोलीस निरीक्षक सुदर्शन कासार, सपोफौ वलीउल्ला काझी, पोहेका शौकत पठाण, प्रकाश औताडे, फरहान पठाण, जावेद काझी आणि चापोका रत्नदीप डोंगरे यांच्या पथकाने केली.
