धाराशिवच्या हातलाई देवी तलावात मराठा समाजाच्या तरुणांनी अचानकपणे उतरून जलसमाधी आंदोलन सुरू केले आहे. मराठा आरक्षणासाठी मनोज जरांगे पाटील यांनी आंतरवली सराटी येथे आमरण उपोषण सुरू केले असून, त्यांच्या मागण्या राज्य सरकारने मान्य कराव्यात, अशी मागणी करत या तरुणांनी दोन तासांपासून तलावात आंदोलन सुरू केले आहे. या तरुणांनी इशारा दिला आहे की, मागण्या मान्य नाही केल्यास ते तलावातून बाहेर येणार नाहीत आणि येथेच जलसमाधी घेणार आहेत.
दुसरीकडे, मराठा समाजाच्या कार्यकर्त्यांनी उपविभागीय कार्यालयाची तोडफोड केली आहे. आंदोलन सुरू असताना वरिष्ठ अधिकारी या आंदोलनाकडे दुर्लक्ष करत असल्याने मराठा समाजातील तरुण आक्रमक झाले आहेत. अधिकाऱ्यांनी अरेरावीची भाषा वापरल्याने संतप्त तरुणांनी दरवाजांवर तोडफोड केली, त्यामुळे परिसरात मोठा गोंधळ सुरू झाला आहे.
आंदोलकांनी परिसरात जोरदार घोषणाबाजी केली असून, आपल्या मागण्यांना मान्यता मिळेपर्यंत कार्यालयासमोर आंदोलन करत राहणार असल्याचे सांगितले आहे. त्यामुळे सध्या परिसरात तणावाचे वातावरण निर्माण झाले आहे. आंदोलकांच्या या आंदोलनामुळे धाराशिव शहरात परिस्थिती अधिकच गोंधळलेली आहे आणि वरिष्ठ अधिकाऱ्यांच्या दुर्लक्षामुळे ही परिस्थिती गंभीर बनली आहे.
