ढोकी : रात्रीच्या वेळी उकाड्यामुळे किंवा निष्काळजीपणाने घराचा दरवाजा उघडा ठेवून झोपणे एका कुटुंबाला चांगलेच महागात पडले आहे. अज्ञात चोरट्याने घरात प्रवेश करून १ लाख २५ हजार रुपयांची रोख रक्कम आणि सोन्याचे दागिने असा एकूण २ लाख ४३ हजार रुपयांचा मुद्देमाल लंपास केल्याची घटना ढोकी (ता. जि. धाराशिव) येथे घडली आहे. या प्रकरणी ढोकी पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, मन्नान हमीदखाँ पठाण (वय ३८, रा. काढी गल्ली, ढोकी, ता. जि. धाराशिव) यांनी या प्रकरणी फिर्याद दिली आहे. मन्नान पठाण हे सोमवारी (दि. ४ मे २०२६) पहाटे २.३० ते ५.३० वाजेच्या दरम्यान आपल्या घराच्या रूमचा दरवाजा उघडा ठेवून झोपले होते. याच संधीचा फायदा घेत अज्ञात चोरट्याने त्यांच्या घरात प्रवेश केला.
चोरट्याने घरातील १ लाख २५ हजार रुपये रोख आणि सोन्याचे दागिने असा एकूण २ लाख ४३ हजार रुपयांचा ऐवज शांतपणे चोरून नेला. सकाळी झोपेतून उठल्यानंतर घरात चोरी झाल्याचा हा प्रकार मन्नान पठाण यांच्या लक्षात आला.
यानंतर त्यांनी तात्काळ ढोकी पोलीस ठाण्यात धाव घेत रीतसर तक्रार नोंदवली. मन्नान पठाण यांनी दिलेल्या प्रथम खबरेवरून ढोकी पोलीस ठाण्यात अज्ञात व्यक्तीविरुद्ध भारतीय न्याय संहिता (BNS) कलम ३०५ (ए) अन्वये चोरीचा गुन्हा दाखल करण्यात आला आहे. या प्रकरणाचा पुढील तपास ढोकी पोलीस करत असून चोरट्यांचा शोध घेतला जात आहे.
