धाराशिव: धाराशिव तालुक्यातील केशेगाव येथील डॉ. बाबासाहेब आंबेडकर सहकारी साखर कारखान्यातून सोडण्यात येणाऱ्या केमिकलयुक्त दूषित पाण्यामुळे शिंदेवाडी, विठ्ठलवाडीसह नदीकाठावरील गावांमधील नागरिकांचे आरोग्य धोक्यात आले आहे. या दूषित पाण्यामुळे जलजन्य आजारांचा प्रादुर्भाव वाढत असल्याने नागरिकांमध्ये भीतीचे वातावरण आहे. गेल्या दहा वर्षांपासून जिल्हा प्रशासनाकडे या समस्येवर कारवाईची मागणी करण्यात येत असली तरी प्रशासनाकडून कोणतीही ठोस कारवाई करण्यात आलेली नाही. त्यामुळे नागरिकांनी तीव्र आंदोलनाचा इशारा दिला आहे.
कारखान्यात ऊस गाळपासाठी वापरण्यात येणारे केमिकलयुक्त पाणी शिंदेवाडी येथील ओढ्यात सोडले जाते. हा ओढा खापरवाडा नदीला मिळतो आणि तेच पाणी शिंदेवाडी, विठ्ठलवाडीसह परिसरातील गावांमधील विहिरी आणि बोअरवेल्समध्ये मिसळते. त्यामुळे नागरिकांना हेच दूषित पाणी प्यावे लागत आहे. हे पाणी विठ्ठलवाडी, बेंबळी मार्गे माकणी येथील निम्न तेरणा धरणातही जाते.
विठ्ठलवाडीला पाणीपुरवठा करण्यासाठी खापरवाडा नदीपात्रात बोअरवेल आणि विहीर खोदण्यात आली असून, ४० लाख रुपये खर्च करून पाईपलाईन आणि पाण्याची टाकी उभारण्यात आली आहे. मात्र, नदीचे पाणी दूषित असल्याने ते पिण्यायोग्य नाही. त्यामुळे हा प्रकल्प निरुपयोगी ठरला आहे. याच नदीपात्रात जलयुक्त शिवार अंतर्गत ६-७ रिचार्ज शाफ्टही बांधण्यात आले आहेत, ज्यामध्ये हे दूषित पाणी साठवले जात आहे.
दूषित पाणी पिण्याने नागरिकांना त्वचेचे आजार, केस गळणे, पोटाचे विकार अशा अनेक समस्यांना सामोरे जावे लागत आहे. तसेच, या पाण्याचा वापर शेतीसाठी केल्याने पिकांचेही नुकसान होत आहे.
नागरिकांनी या समस्येबाबत साखर आयुक्त आणि जिल्हाधिकाऱ्यांकडे अनेक वेळा तक्रारी केल्या आहेत. मात्र, अद्याप कोणतीही ठोस कारवाई झालेली नाही. त्यामुळे नागरिकांनी आता तीव्र आंदोलनाचा इशारा दिला आहे. माजी सरपंच श्रीहरी शिवलकर, माजी ग्रामपंचायत सदस्य रामहरी कस्पटे, परमेश्वर शिवलकर आणि शरद लांडगे यांनी कारखाना प्रशासनाला दूषित पाणी सोडणे बंद करून त्यावर प्रक्रिया करण्याची मागणी केली आहे. अन्यथा, तीव्र आंदोलन करण्यात येईल असा इशारा त्यांनी दिला आहे.
