उमरगा : मागील भांडणाचा राग मनात धरून गैरकायद्याची मंडळी जमवत बाप-लेकाला लोखंडी पट्टी, काठी आणि दगडाने बेदम मारहाण करून गंभीर जखमी केल्याचा प्रकार तुरोरी (ता. उमरगा) येथील नीलू नगर तांड्याजवळ घडला. ‘तुला बघून घेतो’ अशी धमकीही यावेळी देण्यात आली. याप्रकरणी उमरगा पोलीस ठाण्यात ५ जणांविरुद्ध गुन्हा दाखल करण्यात आला आहे.
श्रीकृष्ण माने, अजिंक्य आळंगे, आदित्य पवार, अभिजीत जाधव आणि पवन पाटील (सर्व रा. तुरोरी, ता. उमरगा, जि. धाराशिव) अशी गुन्हा दाखल झालेल्या संशयित आरोपींची नावे आहेत. याप्रकरणी ईश्वर व्यंकट कुकुडे (वय ३६, रा. कुन्हाळी, ता. उमरगा) यांनी १६ एप्रिल रोजी पोलिसांत फिर्याद दिली आहे.
पोलिसांनी दिलेल्या माहितीनुसार, १६ एप्रिल रोजी दुपारी १२ वाजेच्या सुमारास तुरोरी हद्दीतील नीलू नगर तांड्याजवळ असलेल्या आशीर्वाद हॉटेल परिसरात हा प्रकार घडला. फिर्यादी ईश्वर कुकुडे हे तेथे असताना संशयित आरोपींनी मागील भांडणाचे कारण उकरून काढले. गैरकायद्याची मंडळी जमवून त्यांनी कुकुडे यांना शिवीगाळ करण्यास सुरुवात केली. त्यानंतर लाथाबुक्क्यांनी, लोखंडी पट्टी, काठी आणि दगडाने मारहाण करून त्यांना जखमी केले.
भांडण सोडवण्यास आलेल्या मुलालाही मारहाण
हा वाद सुरू असताना फिर्यादी ईश्वर यांचा मुलगा राजेश हा वडील आणि आरोपींचे भांडण सोडवण्यासाठी मध्यस्थी करण्यासाठी पुढे आला. मात्र, संतप्त आरोपींनी राजेशलाही शिवीगाळ करत लाथाबुक्क्यांनी आणि दगडाने बेदम मारहाण केली. जाताना आरोपींनी ‘तुला बघून घेतो’ अशी धमकी देऊन दहशत माजवली.
या प्रकारानंतर ईश्वर कुकुडे यांनी दिलेल्या फिर्यादीवरून उमरगा पोलीस ठाण्यात श्रीकृष्ण माने, अजिंक्य आळंगे, आदित्य पवार, अभिजीत जाधव आणि पवन पाटील यांच्याविरुद्ध भारतीय न्याय संहिता (BNS) कलम १८९(२), १९१(२), १९१(३), १९०, १८१(१), ११५(२), ३५२, ३५१(२), (३) अन्वये गुन्हा नोंदवण्यात आला आहे. या प्रकरणाचा पुढील तपास उमरगा पोलीस करत आहेत.
