लोहारा : ‘आमच्याबद्दल लोकांत काहीही का सांगितले?’ असा जाब विचारत लोखंडी रॉड आणि दगडाने हल्ला करून एकाच कुटुंबातील पाच जणांना गंभीर जखमी केल्याचा धक्कादायक प्रकार लोहारा तालुक्यातील सास्तूर येथे घडला आहे. संतापजनक बाब म्हणजे, हल्लेखोरांनी फिर्यादीच्या अपंग बहिणीलाही बेदम मारहाण केली. याप्रकरणी लोहारा पोलीस ठाण्यात एका महिलेसह तिघांवर गंभीर कलमांन्वये गुन्हा दाखल करण्यात आला आहे.
ओमकार कमलाकर पर्णे, महेश कमलाकर पर्णे आणि अनुसया कमलाकर पर्णे (सर्व रा. सास्तूर, ता. लोहारा, जि. धाराशिव) अशी गुन्हा दाखल झालेल्या संशयित आरोपींची नावे आहेत. या प्रकरणी व्यंकट शिवाप्पा माळी (वय ४५, रा. सास्तूर) यांनी १६ एप्रिल रोजी पोलिसांत फिर्याद दिली आहे.
पोलिसांनी दिलेल्या माहितीनुसार, १५ एप्रिल रोजी सकाळी पावणे नऊ वाजेच्या सुमारास हा प्रकार घडला. संशयित आरोपींनी सुरुवातीला व्यंकट माळी यांच्या पत्नीला फोन करून ‘तुम्ही आमच्याबद्दल काही पण का सांगितले?’ अशी विचारणा करत वाद घातला. यानंतर रागाच्या भरात आरोपींनी माळी यांना शिवीगाळ करत लाथाबुक्क्यांनी, लोखंडी रॉड आणि दगडाने बेदम मारहाण करून गंभीर जखमी केले.
अपंग बहिणीसह वृद्ध आई-वडिलांनाही मारहाण
हा वाद सोडवण्यासाठी आलेल्या फिर्यादीची पत्नी, आई, वडील आणि अपंग बहीण उमल यांच्यावरही आरोपींनी अमानुष हल्ला चढवला. त्यांनाही शिवीगाळ करून लाथाबुक्क्यांनी व दगडाने मारहाण करत जखमी केले. तसेच, जाताना जिवे ठार मारण्याची धमकीही दिली.
या मारहाणीनंतर व्यंकट माळी यांनी दिलेल्या प्रथम खबरीवरून लोहारा पोलीस ठाण्यात आरोपी ओमकार पर्णे, महेश पर्णे आणि अनुसया पर्णे यांच्याविरुद्ध भारतीय न्याय संहिता (BNS) कलम १८१(२), ३३३, ११५(२), ३५२, ३५१(२), (३), ३(५) यासह ‘अपंग व्यक्तीचा अधिकार अधिनियम’ कलम ९२ अन्वये गुन्हा नोंदवण्यात आला आहे. या घटनेमुळे सास्तूर परिसरात खळबळ उडाली असून, लोहारा पोलीस या प्रकरणाचा अधिक तपास करत आहेत.
