वाशी : वृक्ष लागवडीसाठी खड्डे खोदण्याचे काम विनाअडथळा करू देण्यासाठी तब्बल सहा लाख रुपयांची खंडणी मागत एका ४३ वर्षीय महिलेला लोखंडी रॉड आणि काठीने बेदम मारहाण केल्याचा धक्कादायक प्रकार वाशी फाट्याजवळील गायरानात घडला. ‘तुला जिवंत सोडणार नाही’ अशी धमकी देत आरोपींनी महिलेला गंभीर जखमी केले, तसेच जेसीबी चालकालाही मारहाण करून तिघांचे मोबाईल हिसकावून घेतले. याप्रकरणी भूम येथील चौघांवर वाशी पोलीस ठाण्यात गंभीर कलमांन्वये गुन्हा दाखल करण्यात आला आहे.
पांडुरंग लक्ष्मण माने, राजू लक्ष्मण माने, नाना अंकुश माने आणि सलमान पठाण (सर्व रा. भूम, ता. भूम, जि. धाराशिव) अशी गुन्हा दाखल झालेल्या संशयित आरोपींची नावे आहेत. या प्रकरणी शोभा धोंडीराम जाधव (वय ४३, रा. कैकाडी गल्ली, मंडई परंडा, ता. परंडा) यांनी १६ एप्रिल रोजी पोलिसांत फिर्याद दिली आहे.
पोलिसांनी दिलेल्या माहितीनुसार, १४ एप्रिल रोजी सकाळी १० ते ११ वाजेच्या सुमारास वाशी फाट्याजवळील गायरानात शोभा जाधव या वृक्ष लागवडीसाठी खड्डे खोदण्याचे काम करत होत्या. यावेळी संशयित आरोपी त्या ठिकाणी आले. ‘हे काम करून देण्यासाठी आम्हाला सहा लाख रुपये दे,’ अशी थेट खंडणी त्यांनी जाधव यांच्याकडे मागितली. जाधव यांनी विरोध केला असता, आरोपींनी त्यांना शिवीगाळ करत ‘तुला जिवंत सोडणार नाही’ अशी धमकी दिली. तसेच, जिवे ठार मारण्याच्या उद्देशाने आरोपींनी त्यांना लाथाबुक्क्यांनी, लोखंडी रॉड आणि काठीने बेदम मारहाण करून गंभीर जखमी केले.
या जीवघेण्या हल्ल्यादरम्यान आरोपींनी शोभा जाधव यांचे दोन मोबाईल फोन हिसकावून घेतले. तसेच, तेथे उपस्थित असलेले जेसीबी ऑपरेटर मनोज धनवे यांनाही आरोपींनी शिवीगाळ करत लाथाबुक्क्यांनी मारहाण केली आणि त्यांच्याकडील मोबाईल जबरदस्तीने काढून घेतला.
या गंभीर प्रकारानंतर शोभा जाधव यांनी दिलेल्या प्रथम खबरीवरून वाशी पोलीस ठाण्यात पांडुरंग माने, राजू माने, नाना माने आणि सलमान पठाण यांच्याविरुद्ध भारतीय न्याय संहिता (BNS) कलम १०९, १८१(२), ११८(१), ११५(२), ३५२, ११९(१), ३०८(४), १८९(२), १९०, १९१(२), १९१(३), ३५१(२) आणि २९६ अन्वये गुन्हा नोंदवण्यात आला आहे. भरदिवसा घडलेल्या या खंडणी व मारहाणीच्या प्रकारामुळे परिसरात खळबळ उडाली असून, वाशी पोलीस या प्रकरणाचा अधिक तपास करत आहेत.
