धाराशिव : डॉ. बाबासाहेब आंबेडकर जयंती मिरवणुकीत पोलिसांच्या सूचनांचे उल्लंघन करून कर्णकर्कश आवाजात डॉल्बी ‘डीजे’ (DJ) साऊंड सिस्टीम वाजवल्याप्रकरणी धाराशिव पोलिसांनी धडक कारवाई केली आहे. ध्वनी मर्यादेचे उल्लंघन केल्याप्रकरणी स्थानिक आयोजकांसह जालना, पुणे आणि सोलापूर येथील डीजे मालक व चालकांविरुद्ध तब्बल ३ स्वतंत्र गुन्हे दाखल करण्यात आले आहेत.
पोलिसांनी दिलेल्या माहितीनुसार, १४ एप्रिल रोजी सायंकाळी साडेसहा वाजेच्या सुमारास शहरात जयंतीची मिरवणूक काढण्यात आली होती. या मिरवणुकीत पारंपरिक वाद्यांचा वापर करण्याच्या किंवा आवाजाची मर्यादा पाळण्याच्या स्पष्ट सूचना प्रशासनाने दिलेल्या होत्या. मात्र, आयोजक आणि डीजे मालकांनी या सूचना धाब्यावर बसवल्या. वाहनांवर (टॉप आणि बस) डॉल्बी डीजे साऊंड सिस्टीम लावून अत्यंत कर्णकर्कश आवाजात गाणी वाजवण्यात आली. ध्वनी तीव्रतेच्या मर्यादेचे थेट उल्लंघन झाल्याचे निदर्शनास आल्यानंतर पोलिसांनी संबंधितांवर गुन्हे दाखल केले.
यांच्यावर झाले गुन्हे दाखल :
-
पहिला गुन्हा : आयोजक विशाल अशोक हजारे (रा. जेतवन कॉलनी, शाहूनगर, धाराशिव) आणि ‘आरंभ २१ प्लस साऊंड अँड लाईट’चा मालक/चालक वैभव राधेकिसन भोजणे (रा. होळकरनगर, अंबड, जि. जालना).
-
दुसरा गुन्हा : आयोजक प्रशिक भारत गंगावणे (रा. तेरणा कॉलेजजवळ, दत्तनगर, धाराशिव) आणि ‘एकेजी प्रो साऊंड’चा मालक/चालक किरण सुदाम वरघडे (रा. कर्वेनगर, पुणे).
-
तिसरा गुन्हा : आयोजक मकरंद जनार्दन आखाडे (रा. तेरणा कॉलेजजवळ, दत्तनगर, धाराशिव) आणि ‘आरपी फादर साऊंड, सोलापूर’चा चालक/मालक ऋतिक नंदकुमार अष्टूळ (रा. महात्मा फुले मोदी चौक, सोलापूर).
या सर्व आयोजक आणि साऊंड सिस्टीम मालक/चालकांविरुद्ध भारतीय न्याय संहिता (BNS) कलम २२३, २८९, २९२, २९३ यासह पर्यावरण संरक्षण अधिनियम कलम ३ व १५ आणि ध्वनी प्रदूषण नियम २००० च्या कलम ३, ४, ५, ६ अन्वये संबंधित पोलीस ठाण्यात तीन स्वतंत्र गुन्हे नोंदवण्यात आले आहेत. या धडक कारवाईमुळे डीजे मालक आणि नियम मोडणाऱ्या आयोजकांचे धाबे दणाणले आहेत.
