वाशी: कत्तलीसाठी घेऊन जाण्याच्या उद्देशाने पिकअपमधून जनावरांची अत्यंत निर्दयपणे वाहतूक करणाऱ्या एका वाहन चालकावर वाशी पोलिसांनी कारवाई केली आहे. पार्डी फाटा येथे करण्यात आलेल्या या कारवाईत पोलिसांनी ३ गायी आणि ३ वासरे अशा ६ जनावरांची सुटका केली असून एका तरुणावर गुन्हा दाखल करण्यात आला आहे.
पोलिसांनी दिलेल्या माहितीनुसार, ३१ जानेवारी २०२६ रोजी सायंकाळी ६:३० वाजेच्या सुमारास पार्डी फाटा येथे वाशी पोलीस गस्त घालत होते. यावेळी एमएच ४४-९३०२ या क्रमांकाच्या पिकअप वाहनाची तपासणी केली असता, त्यात गोवंशीय जनावरे असल्याचे आढळून आले.
वाहन चालक अदनान अजीम काझी (वय २०, रा. धाराशिव) हा या पिकअपमधून ३ जर्सी गायी आणि ३ वासरे (एकूण किंमत १ लाख ५ हजार रुपये) यांची वाहतूक करत होता. ही जनावरे वाहनात चारा-पाण्याची कोणतीही सोय नसताना अत्यंत दाटीवाटीने आणि क्रूरतेने भरलेली होती. ही वाहतूक कत्तलीसाठी बेकायदेशीर रित्या केली जात असल्याचे तपासात निष्पन्न झाले.
पोलिसांनी तात्काळ कारवाई करत जनावरांची सुटका केली. याप्रकरणी वाशी पोलीस ठाण्यात सरकारतर्फे दिलेल्या फिर्यादीवरून अदनान काझी याच्याविरुद्ध ‘प्राण्यांना क्रूरतेने वागवण्यास प्रतिबंध अधिनियम’ कलम ११ (१) मधील विविध पोटकलमे आणि ‘महाराष्ट्र प्राणी संरक्षण अधिनियम’ कलम ५(अ), ५(बी), ९(बी) व ११ अन्वये गुन्हा दाखल करण्यात आला आहे.
