उमरगा : ग्रामीण भागात अवैध व्यवसायांचे पेव फुटले असतानाच उमरगा पोलिसांनी गुंजोटी येथे एका ठिकाणी छापा टाकून गांजा विक्रीचा पर्दाफाश केला आहे. या कारवाईत पोलिसांनी ११ हजार २०० रुपये किमतीचा ५६० ग्रॅम गांजा जप्त केला असून एका व्यक्तीविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, गुंजोटी (ता. उमरगा) येथे एका व्यक्तीकडे अवैध गांजा असल्याची माहिती उमरगा पोलिसांना मिळाली होती. त्याआधारे पोलिसांनी ३० मार्च २०२५ रोजी रात्री ११:१५ वाजण्याच्या सुमारास गुंजोटी येथील संशयित आरोपीच्या घरी छापा टाकला.
आरोपी गौरीशंकर बसवणप्पा नाकेदार (वय ३६, रा. गुंजोटी) याने आपल्या राहत्या घरात चोरटी विक्री करण्याच्या उद्देशाने गांजा बाळगला होता. घराची झडती घेतली असता पोलिसांना तिथे ५६० ग्रॅम वजनाचा गांजासारखा अमली पदार्थ मिळून आला. बाजारात या गांजाची किंमत सुमारे ११ हजार २०० रुपये इतकी आहे.
पोलिसांनी हा मुद्देमाल जप्त केला असून, गौरीशंकर नाकेदार याच्याविरुद्ध उमरगा पोलीस ठाण्यात ‘अंमली औषधी द्रव्य आणि मन:प्रभावी पदार्थ अधिनियम’ (NDPS Act) कलम २० (ब), (ii) (अ) आणि ८ (क) अन्वये गुन्हा दाखल करण्यात आला आहे. पुढील तपास उमरगा पोलीस करत आहेत.
