तामलवाडी – तुळजापूर उपविभागाच्या ‘पिंक पथका’ने (Pink Squad) तामलवाडी येथे मोठी कारवाई करत शासनाने प्रतिबंधित केलेला गुटखा आणि सुगंधित तंबाखूचा साठा जप्त केला आहे. मंगळवारी (दि. २६) दुपारी करण्यात आलेल्या या कारवाईत तब्बल २ लाख ६१ हजार रुपये किमतीचा मुद्देमाल जप्त करण्यात आला असून, याप्रकरणी तामलवाडी पोलीस ठाण्यात एकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तामलवाडी येथील एका घरात अवैध गुटखा साठा असल्याची माहिती तुळजापूर उपविभागाच्या पिंक पथकाला मिळाली होती. त्यावरून पथकाने २६ नोव्हेंबर २०२५ रोजी दुपारी १ वाजण्याच्या सुमारास आरोपी ज्ञानेश्वर उर्फ हरीदास अरुण गायकवाड (वय ३६ वर्षे, रा. तामलवाडी, ता. तुळजापूर) याच्या राहत्या घरी छापा टाकला.
या झडतीदरम्यान घरात विक्रीसाठी साठवून ठेवलेला आरएमडी पान मसाला, एम गोल्ड तंबाखू, डायरेक्टर पान मसाला, विमल पान मसाला, बादशहा पान मसाला, जाफरानी जर्दा तंबाखू, रजनीगंधा आणि विविध प्रकारची सुगंधित तंबाखू मिळून आली. या सर्व साहित्याची एकूण किंमत २ लाख ६१ हजार रुपये इतकी आहे.
पथकाने हा सर्व मुद्देमाल जप्त केला असून, आरोपी ज्ञानेश्वर गायकवाड याच्याविरुद्ध तामलवाडी पोलीस ठाण्यात भारतीय न्याय संहिता (BNS) कलम १२३, २२३, २७४, २७५ सह अन्न सुरक्षा व मानके कायदा कलम २६ (२)(i), २६(२)(iv), २७(३)(e), ३०(२) अन्वये गुन्हा दाखल करण्यात आला आहे. या कारवाईमुळे अवैध व्यवसाय करणाऱ्यांचे धाबे दणाणले आहेत.
