तुळजापूर: तुळजापूर तालुक्यातील मसला खुर्द येथे शासकीय सभागृह पाडण्यात आल्याच्या गंभीर घटनेला दोन महिने उलटून गेले आहेत. मात्र, अद्याप या प्रकरणी संबंधितांवर कोणतीही ठोस कारवाई करण्यात आलेली नाही. जिल्हाधिकाऱ्यांनी स्वतः या प्रकरणी पोलीस अधीक्षकांना पत्र देऊनही पोलीस प्रशासनाकडून हालचाल होत नसल्याने आश्चर्य व्यक्त केले जात आहे. प्रशासनच दोषींना अभय देत असल्याचा आरोप आता ग्रामस्थांकडून होत आहे.
मिळालेल्या माहितीनुसार, मसला खुर्द येथे शासकीय निधीतून बांधलेले सभागृह पाडण्यात आले होते. या गंभीर प्रकाराची दखल घेत ३ नोव्हेंबर २०२५ रोजी चौकशी अधिकारी ए.सी. कावळे यांच्यामार्फत चौकशी पूर्ण करण्यात आली. मात्र, चौकशी होऊन अनेक दिवस लोटले तरी कावळे यांनी आपला अहवाल अद्याप गटविकास अधिकाऱ्यांकडे (BDO) सादर केलेला नाही. अहवाल सादर करण्यास जाणीवपूर्वक टाळाटाळ केली जात असल्याने प्रशासनाच्या हेतूवर शंका उपस्थित होत आहे.
आमदारांच्या दबावामुळे कारवाई रखडली?
या प्रकरणात मोठा राजकीय हस्तक्षेप होत असल्याचे दिसून येत आहे. स्थानिक आमदार राणा पाटील यांचा प्रशासकीय अधिकाऱ्यांवर दबाव असल्यानेच कारवाईस विलंब होत असल्याची चर्चा तालुक्यात जोरात सुरू आहे. जिल्हा परिषदेचे मुख्य कार्यकारी अधिकारी (CEO) यांच्या स्तरावरूनही या प्रकरणात कोणतीही कारवाई झालेली नाही.
शासकीय मालमत्तेचे नुकसान करणाऱ्या दोषी व्यक्तींना पाठीशी न घालता, प्रशासनाने राजकीय दबावाला बळी न पडता लवकरात लवकर कठोर कारवाई करावी, अशी मागणी मसला खुर्द येथील जनतेतून होत आहे.
