धाराशिव: येडशी येथील छत्रपती शिवाजी महाराज चौकात स्थानिक गुन्हे शाखेच्या (एलसीबी) पथकाने सापळा रचून इनोव्हा कारमधून होणारी विदेशी दारूची चोरटी वाहतूक पकडली. या कारवाईत पोलिसांनी ६ लाख ३४ हजार ६०० रुपयांच्या मुद्देमालासह दोन आरोपींना अटक केली आहे. गुरुवारी (दि. २१) सायंकाळच्या सुमारास ही कारवाई करण्यात आली.
याबाबत पोलिसांकडून मिळालेली माहिती अशी की, धाराशिव जिल्ह्यातील मालमत्तेविषयीचे गुन्हे उघडकीस आणणे, फरार आरोपींचा शोध घेणे आणि अवैध धंद्यांवर कारवाई करण्यासाठी स्थानिक गुन्हे शाखेचे पथक पेट्रोलिंगवर होते. हे पथक येडशी येथील छत्रपती शिवाजी महाराज चौकात आले असता, सहाय्यक पोलीस निरीक्षक अमोल मोरे यांना गुप्त बातमीदाराकडून एक खात्रीशीर माहिती मिळाली. एका इनोव्हा कारमधून (क्र. एमएच १५ बीएक्स ६८२०) अवैध विदेशी दारूची चोरटी वाहतूक केली जात असल्याची ती माहिती होती.
मिळालेल्या माहितीच्या आधारे पथकाने तातडीने चौकात नाकेबंदी करून सापळा रचला. सायंकाळी साडेपाच वाजेच्या सुमारास संशयित इनोव्हा कार येताना दिसली. पोलिसांनी कार थांबवून चालकाची चौकशी केली असता, त्याने आपले नाव सुभाष भीमराव उर्फ लाला काळे (वय ३३, रा. कन्हेरवाडी, ता. कळंब, जि. धाराशिव) असे सांगितले.
पोलिसांनी कारची सखोल पाहणी केली असता, पाठीमागील सीटवर आणखी एक इसम बसलेला आढळला. त्याचे नाव दादा रामा काळे (वय ४६, रा. जुना बस डेपो, पारधी पिढी, धाराशिव) असल्याचे निष्पन्न झाले. सीटच्या पाठीमागील भागात विदेशी दारूचे बॉक्स लपवून ठेवण्यात आले होते. पोलिसांनी दारूचे बॉक्स आणि इनोव्हा कार असा एकूण ६ लाख ३४ हजार ६०० रुपयांचा मुद्देमाल जप्त केला. या प्रकरणी दोन्ही आरोपींविरुद्ध महाराष्ट्र दारूबंदी कायद्यान्वये गुन्हा दाखल करण्यात आला आहे.
ही कामगिरी पोलीस अधीक्षक श्रीमती रितु खोखर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद ईज्जपवार, सपोनि अमोल मोरे, पोलीस अंमलदार बळीराम शिंदे, अमोल चव्हाण आणि चालक पोलीस कॉन्स्टेबल दहीहांडे यांच्या पथकाने केली.
