भूम: भूम तालुक्यातील वालवड येथे चोरांनी धुमाकूळ घालत एकाच रात्री दोन सराफा दुकाने फोडल्याची घटना समोर आली आहे. चोरट्यांनी शटर उचकटून आत प्रवेश करत सुमारे ९८ हजार रुपये किमतीचे चांदीचे दागिने चोरून नेले आहेत. ही घटना २४ ते २६ नोव्हेंबर दरम्यान घडली.
याप्रकरणी तानाजी आनंतराव वेदपाठक (वय ४३, रा. बावी, ता. भूम) यांनी फिर्याद दिली आहे. वालवड येथील आठवडी बाजार आणि वाल्मीकेश्वर मंदिर रोडवर फिर्यादी वेदपाठक यांचे ‘ओम ज्वेलर्स’ आणि त्यांच्या शेजारीच आप्पासाहेब यशवंत चव्हाण यांचे ‘न्यु प्रेम ज्वेलर्स’ ही दुकाने आहेत. अज्ञात चोरट्यांनी या दोन्ही दुकानांचे कुलूप तोडून व शटर उचकटून आत प्रवेश केला.
दुकानातील १,९६० ग्रॅम वजनाचे विविध चांदीचे दागिने (किंमत अंदाजे ९८,००० रुपये) चोरट्यांनी लंपास केले. या घटनेमुळे व्यापारी वर्गात खळबळ उडाली आहे. याप्रकरणी भूम पोलीस ठाण्यात अज्ञात व्यक्तीविरुद्ध भारतीय न्याय संहिता कलम ३३१(३), ३३१(४) आणि ३०५ अन्वये गुन्हा दाखल करण्यात आला आहे.
येडशीच्या रामलिंग मंदिर परिसरातून दुचाकी चोरीला
येडशी येथील प्रसिद्ध रामलिंग मंदिर परिसरातील कमानीसमोरून पार्क केलेली दुचाकी अज्ञात चोरट्याने पळवून नेली. ही घटना २५ नोव्हेंबर रोजी दुपारी ३ ते ५ वाजेच्या दरम्यान घडली.
विजय भागवत नलावडे (वय ३७, रा. येडशी) यांनी याप्रकरणी धाराशिव ग्रामीण पोलीस ठाण्यात फिर्याद दिली आहे. नलावडे यांनी त्यांची हिरो स्प्लेंडर मोटरसायकल (क्रमांक एमएच २५ एए ०१०३) मंदिर परिसरात उभी केली होती. अज्ञात चोरट्याने संधी साधत ३० हजार रुपये किमतीची ही दुचाकी चोरून नेली. याप्रकरणी पोलिसांत भारतीय न्याय संहिता कलम ३०३(२) अन्वये गुन्हा नोंदवण्यात आला आहे.
परंडा तालुक्यातील रोसा शिवारात शेतमजुराची चोरी; ४० हजारांचा ऐवज लंपास
परंडा तालुक्यातील रोसा शिवारातील एका शेतातील झोपडीत राहणाऱ्या व्यक्तीचे पैसे आणि मोबाईल असा ४० हजारांचा मुद्देमाल चोरून नेल्याची घटना घडली आहे. याप्रकरणी एका ओळखीच्या व्यक्तीसह अन्य तिघांवर गुन्हा दाखल करण्यात आला आहे.
शैलेश आनंदराव बेले (वय ३९, रा. जवळी, ता. पुसद, जि. यवतमाळ, सध्या रा. रोसा) यांनी परंडा पोलिसांत फिर्याद दिली आहे. शैलेश हे रोसा शिवारातील सचिन जगताप यांच्या शेतातील झोपडीत राहत होते. २६ नोव्हेंबर रोजी पहाटे ३ वाजेच्या सुमारास आरोपी विजय सल्ले (रा. भोत्रा, ता. परंडा) आणि त्याच्यासोबत असलेल्या इतर तीन अनोळखी व्यक्तींनी झोपडीतून रोख ३५ हजार रुपये आणि एक मोबाईल फोन चोरून नेला. याप्रकरणी परंडा पोलीस ठाण्यात भारतीय न्याय संहिता कलम ३०५(ए), ३(५) अन्वये गुन्हा दाखल करण्यात आला आहे.
