उमरगा – तालुक्यातील केसरजवळगा येथे स्वातंत्रदिनाच्या सकाळी झेंडावंदनाच्या कार्यक्रमावरून सरपंच पती आणि उपसरपंचात चांगलीच खडाजंगी झाली .
15 ऑगस्ट रोजी केसरजवळगा येथील विविध ठिकाणी झेंडावंदनाचे कार्यक्रम आयोजित करण्यात आले होते. यातील ग्रामपंचायत कार्यालय येथील कार्यक्रम ८ वाजता होणार होता, मात्र सरपंच पती अमोल पटवारी यांनी ७.४५ वाजताच काही निवडक लोकांसह ध्वजारोहण करून कार्यक्रम उरकून घेतला.
या घटनेची माहिती मिळताच उपसरपंच अझर इनामदार आणि ग्रामस्थ घटनास्थळी पोहोचले आणि सरपंच पतींना जाब विचारला. यावेळी सरपंच पतींची चांगलीच भंबेरी उडाली आणि ते घरी पळून गेले.
ग्रामस्थांच्या म्हणण्यानुसार, सरपंच पूजा पटवारी यांच्या अनुपस्थितीत त्यांचे पती अमोल पटवारी हेच ग्रामपंचायतीचा कारभार पाहतात. सरपंच पतींच्या या मनमानी कारभाराविरोधात ग्रामपंचायत सदस्य वरिष्ठांकडे तक्रार करणार असल्याचे सांगितले आहे.
या घटनेमुळे केसरजवळगा ग्रामपंचायतीतील सरपंच पतींच्या हस्तक्षेपाचा मुद्दा पुन्हा एकदा चर्चेत आला आहे. महिला सबलीकरणाच्या दिशेने सरकारने सरपंचपदी महिलांना संधी दिली असली तरी प्रत्यक्षात त्यांच्या पतींकडूनच कारभार चालवला जात असल्याचे चित्र या निमित्ताने पुढे आले आहे.
