लोहारा : कत्तलीच्या उद्देशाने दोन वाहनांमध्ये कोंबून अत्यंत क्रूरपणे वाहतूक केल्या जात असलेल्या १३ जर्सी गायी व एका वासराला लोहारा पोलिसांनी गुरुवारी (ता. ७) तावशीगड शिवारात कारवाई करत जीवदान दिले. या धडक कारवाईत जनावरे आणि दोन वाहनांसह एकूण १० लाख २० हजार रुपयांचा मुद्देमाल जप्त करण्यात आला असून, याप्रकरणी तिघांवर लोहारा पोलीस ठाण्यात गुन्हा दाखल करण्यात आला आहे.
महेबुब कलीम सवार (वय २४), महेश ज्ञानेश्वर स्वामी (वय १९) आणि आमीन कुरेशी (तिघेही रा. लोहारा, ता. लोहारा, जि. धाराशिव) असे गुन्हा दाखल झालेल्या संशयित आरोपींची नावे आहेत.
पोलिसांकडून मिळालेल्या माहितीनुसार, माकणी ते तावशीगड जाणार्या रस्त्यावर तावशीगड शिवारातील महादेव मंदिराजवळ गुरुवारी (ता. ७) साडेतीन वाजेच्या सुमारास पोलीस गस्तीवर होते. यावेळी संशयास्पद वाटलेली एक पिकअप (क्र. एमएच १३ एएन ६८७५) आणि अशोक लेलँड (क्र. एमएच २४ बीडब्ल्यू १५५३) या दोन वाहनांना थांबवून पोलिसांनी त्यांची तपासणी केली.
यावेळी या दोन्ही वाहनांमध्ये अत्यंत दाटीवाटीने आणि क्रूरपणे गोवंशीय जनावरे भरल्याचे पोलिसांच्या निदर्शनास आले. या जनावरांच्या चारा-पाण्याची कोणतीही व्यवस्था करण्यात आलेली नव्हती. ही सर्व जनावरे कत्तलीसाठी निर्दयतेने आणि बेकायदेशीररित्या घेऊन जात असल्याचे तपासात उघड झाले.
१० लाखांचा मुद्देमाल जप्त
या कारवाईत पोलिसांनी दोन्ही वाहनांमधून २ लाख २० हजार रुपये किमतीच्या १३ जर्सी गायी व एक वासरू यांची सुटका केली. तसेच गुन्ह्यात वापरलेली दोन्ही वाहने असा एकूण १० लाख २० हजार रुपये किमतीचा मुद्देमाल पोलिसांनी जप्त केला आहे.
या प्रकरणी लोहारा पोलिसांच्या वतीने सरकारतर्फे दिलेल्या फिर्यादीवरून प्राण्यांना क्रूरतेने वागविण्यास प्रतिबंध अधिनियम कलम ११(१)(डी)(ई)(एच) सह महाराष्ट्र पोलीस कायदा (मपोका) कलम ११९ आणि भारतीय न्याय संहिता (BNS) कलम ३(५) अन्वये तिन्ही आरोपींविरुद्ध गुन्हा दाखल करण्यात आला आहे. या प्रकरणाचा अधिक तपास लोहारा पोलीस करत आहेत.
