धाराशिव | धाराशिव जिल्ह्यासाठी अत्यंत महत्त्वाच्या ठरणाऱ्या 500 खाटांच्या नवीन जिल्हा रुग्णालयाच्या उभारणीला अखेर आर्थिक गती मिळाली आहे. महाराष्ट्र शासनाने या प्रकल्पासाठी पहिल्या टप्प्यात ₹18 कोटी 46 लाखांचा निधी वितरित करण्यास मंजुरी दिली असून, त्यामुळे प्रत्यक्ष बांधकामाला वेग येण्याचा मार्ग मोकळा झाला आहे.
सार्वजनिक आरोग्य विभागाने 9 जुलै 2026 रोजी यासंदर्भातील शासन निर्णय जारी केला आहे. या प्रकल्पासाठी यापूर्वीच ₹361.50 कोटींची प्रशासकीय मान्यता देण्यात आली होती. हा निधी आशियाई विकास बँकेच्या (ADB) अर्थसहाय्यित प्रकल्पातून उपलब्ध करून देण्यात येत आहे.
शासन निर्णयानुसार मंजूर करण्यात आलेल्या ₹18.46 कोटींपैकी ₹13.46 कोटी ही रक्कम काम सुरू करण्यासाठी कंत्राटदाराला मोबिलायझेशन अॅडव्हान्स म्हणून देण्यात येणार आहे. तसेच ₹5 कोटींचा निधी रुग्णालयाच्या परिसरातील 33 केव्ही उच्चदाब वीजवाहिनी स्थलांतरित करण्यासाठी खर्च केला जाणार आहे.
या अत्याधुनिक रुग्णालयाचे बांधकाम टर्नकी पद्धतीने करण्यात येणार असून, त्याची जबाबदारी मे. न्याती इंजिनिअर्स अँड कन्सल्टंट्स प्रा. लि. या संस्थेकडे देण्यात आली आहे. मंजूर निधीचा खर्च सार्वजनिक बांधकाम विभाग, धाराशिव यांच्या माध्यमातून करण्यात येणार असून, खर्चाची सर्व माहिती शासनाकडे नियमितपणे सादर करण्याच्या सूचनाही देण्यात आल्या आहेत.
500 खाटांचे हे नवीन जिल्हा रुग्णालय उभारल्यानंतर धाराशिव जिल्ह्यातील आरोग्य सेवेत मोठी सुधारणा होण्याची अपेक्षा आहे. गंभीर रुग्णांवर उपचारासाठी बाहेरील जिल्ह्यांवर असलेले अवलंबित्व कमी होईल, तसेच आधुनिक वैद्यकीय सुविधा स्थानिक नागरिकांना उपलब्ध होतील.
शासनाने निधीच्या पहिल्या टप्प्याला मंजुरी दिल्याने आता या बहुप्रतीक्षित प्रकल्पाच्या प्रत्यक्ष कामाला वेग येणार असल्याची अपेक्षा व्यक्त केली जात आहे.
