येरमाळा : रेशनचा माल मागितल्याच्या कारणावरून एकाला शिवीगाळ करत लोखंडी सळई आणि लाकडी काठीने बेदम मारहाण केल्याची घटना कळंब तालुक्यातील बाभळगाव शिवारात घडली. याप्रकरणी गुरुवारी (दि. २३) येरमाळा पोलीस ठाण्यात चार जणांविरुद्ध गुन्हा दाखल करण्यात आला आहे.
पोलिसांकडून मिळालेल्या माहितीनुसार, दिगंबर नरहरी बेडके (वय ४२, रा. बाभळगाव, ता. कळंब, जि. धाराशिव) असे मारहाण होऊन जखमी झालेल्या फिर्यादीचे नाव आहे. दि. १८ एप्रिल रोजी संध्याकाळी ७ वाजेच्या सुमारास बाभळगाव शिवारात हा प्रकार घडला. फिर्यादी दिगंबर बेडके यांनी रेशनचा माल मागितल्याच्या कारणावरून आरोपी प्रेमनाथ मधुकर वाघमारे, राम मधुकर वाघमारे (दोघे रा. बाभळगाव, ता. कळंब), अक्षय विष्णू धोंगडे (रा. धारूर, ता. धारूर, जि. बीड) आणि लिंबराज बोबडे (रा. बोबडेवाडी, ता. केज, जि. बीड) यांनी त्यांच्याशी वाद घातला.
या वादानंतर संतप्त झालेल्या आरोपींनी फिर्यादीला अश्लील शिवीगाळ करण्यास सुरुवात केली. तसेच, लाथाबुक्क्यांनी, लोखंडी सळई आणि लाकडी काठीने जबर मारहाण करून दिगंबर यांना जखमी केले. एवढ्यावरच न थांबता या चौघांनी त्यांना जीवे मारण्याची धमकीही दिली.
या घटनेनंतर, दिगंबर बेडके यांनी दि. २३ एप्रिल रोजी पोलिसांत धाव घेत प्रथम खबर दिली. या फिर्यादीवरून येरमाळा पोलीस ठाण्यात चारही आरोपींविरुद्ध भारतीय न्याय संहिता (BNS) कलम ११८(२), ११५(२), ३५२, ३५१(२), (३) आणि ३(५) अन्वये गुन्हा नोंदवण्यात आला आहे. या घटनेचा पुढील तपास येरमाळा पोलीस करत आहेत.
