धाराशिव: काजळा येथे एका ५८ वर्षीय महिलेला गैरकायद्याची मंडळी जमवून शिवीगाळ करत लाथाबुक्क्यांनी बेदम मारहाण केल्याची धक्कादायक घटना समोर आली आहे. या मारहाणीत महिला गंभीर जखमी झाली असून, भांडण सोडविण्यासाठी आलेल्या तिच्या पतीलाही आरोपींनी शिवीगाळ करून धमकी दिली. याप्रकरणी धाराशिव ग्रामीण पोलिस ठाण्यात कळंब आणि अपसिंगा येथील तब्बल सात जणांविरुद्ध गुन्हा दाखल करण्यात आला आहे.
ठळक मुद्दे:
-
घटनेचे ठिकाण: काजळा (ता. जि. धाराशिव)
-
फिर्यादी: सुरेखा माणिक कोरे (वय ५८ वर्षे, रा. शाहू नगर, काकडे प्लॉट, धाराशिव)
-
आरोपी: कळंबमधील तीन आणि अपसिंगा (ता. तुळजापूर) येथील चार जण, असे एकूण सात आरोपी.
पोलिसांनी दिलेल्या माहितीनुसार, सुरेखा माणिक कोरे या धाराशिव शहरातील शाहू नगर भागात वास्तव्यास आहेत. शुक्रवार, दि. ८ मे रोजी दुपारी ४ वाजण्याच्या सुमारास त्या काजळा येथे असताना हा प्रकार घडला.
कळंब येथील आरोपी नितीन महादेव माळी, निता नितीन माळी, जनाबाई महादेव माळी आणि अपसिंगा (ता. तुळजापूर) येथील नारायण नामदेव तोडकरी, अनिता नारायण तोडकरी, दिपक नारायण तोडकरी, रोहित नारायण तोडकरी या सात जणांनी गैरकायद्याची मंडळी जमवली. त्यांनी फिर्यादी सुरेखा कोरे यांना अकारण शिवीगाळ करण्यास सुरुवात केली. त्यानंतर आरोपींनी त्यांना लाथाबुक्क्यांनी बेदम मारहाण केली, ज्यामध्ये सुरेखा कोरे या गंभीर जखमी झाल्या.
पतीलाही दिली धमकी
पत्नीला सात जणांकडून मारहाण होत असल्याचे पाहून सुरेखा कोरे यांचे पती भांडण सोडविण्यासाठी मध्ये पडले. मात्र, संतप्त आरोपींनी त्यांनाही शिवीगाळ करत जीवे मारण्याची धमकी दिली.
या घटनेनंतर सुरेखा कोरे यांनी उपचारांनंतर मंगळवारी (दि. १२ मे) धाराशिव ग्रामीण पोलिस ठाणे गाठून तक्रार दिली. त्यांच्या फिर्यादीवरून पोलिसांनी वरील सातही आरोपींविरुद्ध भारतीय न्याय संहिता (BNS) कलम ११७(२), ११९(१), ११५(२), १८९(२), १९०, १९१(२), ३५१(२), (३) आणि ३५२ नुसार गुन्हा नोंदवला आहे. या प्रकरणाचा अधिक तपास धाराशिव ग्रामीण पोलिस करत आहेत.
