नळदुर्ग: तुळजापूर तालुक्यातील हवलदरा तांडा (होर्टी) येथे एका १९ वर्षीय तरुणीला चाकूचा धाक दाखवून, मारहाण करत ६ लाख रुपयांचा ऐवज लुटल्याची धक्कादायक घटना उघडकीस आली आहे. तरुणीने आरडाओरड करू नये म्हणून आरोपींनी तिचे गाडीतून अपहरण केले व नंतर तिला तिच्या मामाच्या घरासमोर नेऊन सोडले. याप्रकरणी नळदुर्ग पोलिस ठाण्यात लातूर जिल्ह्यातील दोन तरुणांवर गुन्हा दाखल करण्यात आला आहे.
ठळक मुद्दे:
-
घटनेचे ठिकाण: हवलदरा तांडा होर्टी (ता. तुळजापूर) येथील शेत
-
लुटलेला ऐवज: १ लाख ३० हजार रोख आणि १५ ग्रॅम सोन्याचे दागिने (एकूण किंमत ६ लाख रुपये)
-
आरोपींची नावे: अभिषेक दिलीप जाधव आणि सोन्या जाधव (दोघे रा. लिंबाळा तांडा, ता. औसा, जि. लातूर)
पोलिसांनी दिलेल्या माहितीनुसार, स्वाती शुभम चव्हाण (वय १९, रा. हवलदरा तांडा, होर्टी, ता. तुळजापूर, जि. धाराशिव) यांनी याप्रकरणी फिर्याद दिली आहे. ६ मे रोजी दुपारी ३ वाजण्याच्या सुमारास स्वाती चव्हाण या हवलदरा तांडा येथील शेतात असताना आरोपी अभिषेक आणि सोन्या तेथे आले.
त्यांनी स्वाती यांना ‘तुला चाकूने भोसकून टाकू’ अशी धमकी दिली आणि हाताने बेदम मारहाण केली. यानंतर आरोपींनी त्यांच्याजवळील १ लाख ३० हजार रुपये रोख रक्कम आणि १५ ग्रॅम वजनाचे सोन्याचे दागिने असा एकूण ६ लाख रुपयांचा मुद्देमाल बळजबरीने हिसकावून घेतला.
अपहरण करून मामाच्या दारात सोडले
हातातील ऐवज लुटल्यानंतर स्वाती या आरडाओरड करतील आणि लोक गोळा होतील, या भीतीने आरोपींनी त्यांना बळजबरीने त्यांच्या गाडीत बसवले. तेथून त्यांचे अपहरण करून ते घेऊन गेले. त्यानंतर काही वेळाने आरोपींनी स्वाती यांना त्यांच्या मामाच्या घरासमोर नेऊन सोडले आणि तेथून पोबारा केला.
या भयंकर प्रकारामुळे घाबरलेल्या स्वाती चव्हाण यांनी अखेर मंगळवारी (ता. १२) नळदुर्ग पोलिस ठाण्यात धाव घेत घडलेला प्रकार सांगितला. त्यांच्या प्रथम खबरीवरून नळदुर्ग पोलिसांनी आरोपी अभिषेक जाधव आणि सोन्या जाधव यांच्याविरुद्ध भारतीय न्याय संहिता (BNS) कलम ११९(१), १४०(३), ३३३ आणि ३(५) नुसार गुन्हा नोंदवला आहे. या प्रकरणाचा अधिक तपास नळदुर्ग पोलिस करत आहेत.
