मुरुम: उमरगा तालुक्यातील मुरुम येथे जुन्या वादाच्या कारणावरून एका २४ वर्षीय तरुणावर हॉटेलमध्ये घुसून तलवार आणि पट्ट्याने हल्ला केल्याची धक्कादायक घटना घडली आहे. सोमवारी (दि. २५ ऑगस्ट) रात्री साडेदहा वाजण्याच्या सुमारास झालेल्या या हल्ल्यात तरुण गंभीर जखमी झाला आहे. याप्रकरणी दोघांविरोधात मुरुम पोलीस ठाण्यात गुन्हा दाखल करण्यात आला आहे.
संकेत चंद्रशेखर स्वामी (वय २४, रा. येणेगुर, ता. उमरगा) असे जखमी तरुणाचे नाव असून, त्यांनी याप्रकरणी फिर्याद दिली आहे. पोलिसांनी दिलेल्या माहितीनुसार, संकेत स्वामी हे मुरुम मोड येथील गोविंद कोंगळे यांच्या हॉटेलमध्ये असताना आरोपी शंकर नागेश धामशेट्टी (रा. येणेगुर) आणि अंकुश फुलचंद जमादार (रा. नळवाडी) तिथे आले.
आरोपींनी मागील भांडणाचा राग मनात धरून संकेत यांना शिवीगाळ करण्यास सुरुवात केली. त्यानंतर त्यांना लाथाबुक्क्यांनी मारहाण केली. एवढ्यावरच न थांबता आरोपींनी कमरेला असलेली तलवार आणि पट्टा काढून संकेत यांच्यावर हल्ला चढवला, ज्यात ते गंभीर जखमी झाले.
घटनेनंतर संकेत स्वामी यांनी २६ ऑगस्ट रोजी मुरुम पोलीस ठाण्यात तक्रार दाखल केली. त्यांच्या तक्रारीवरून पोलिसांनी आरोपी शंकर धामशेट्टी आणि अंकुश जमादार यांच्या विरोधात भारतीय न्याय संहिता (भा.न्या.सं.) कलम ११८(२), ११५(२), ३५२, ३(५) अन्वये गुन्हा नोंदवला आहे. मुरुम पोलीस दोन्ही आरोपींचा शोध घेत असून, प्रकरणाचा अधिक तपास करत आहेत.
