उमरगा – ऑईल टँकर जहाजावर नोकरी लावण्याचे आणि ट्रेनिंग पूर्ण झाल्याचे बनावट सर्टिफिकेट काढून देण्याचे आमिष दाखवून उमरगा तालुक्यातील व्हंताळ येथील एका २५ वर्षीय तरुणाला १ लाख ९९ हजार रुपयांना गंडवल्याचा प्रकार उघडकीस आला आहे. याप्रकरणी तब्बल १० महिन्यांनंतर तरुणाने दिलेल्या फिर्यादीवरून रत्नागिरी आणि बीड जिल्ह्यातील दोन आरोपींविरुद्ध उमरगा पोलीस ठाण्यात फसवणुकीचा गुन्हा दाखल करण्यात आला आहे.
संदिप माधव मगर (वय २५ वर्षे, रा. व्हंताळ, ता. उमरगा, जि. धाराशिव) असे फसवणूक झालेल्या तरुणाचे नाव आहे. त्यांनी गुरुवारी (दि. १० एप्रिल २०२५) उमरगा पोलीस ठाण्यात फिर्याद दिली आहे. फिर्यादीनुसार, आरोपी तेजस राकेश शिंदे (रा. चैतन्यब्रम्ह अपार्टमेंट, चिपळूण, जि. रत्नागिरी) आणि अजय देवकर (रा. साक्षाळ पिंपरी, ता. गेवराई, जि. बीड) यांनी गेल्या वर्षी १२ जून २०२४ ते २५ जून २०२४ या कालावधीत मोबाईल फोनवरून फिर्यादी संदिप मगर यांच्याशी संपर्क साधला.
आरोपींनी संदिप यांना, “तुला ऑईल टँकर शिपवर (जहाज) कामाला लावतो आणि तुझे ट्रेनिंग झाले आहे, असे सर्टिफिकेट काढून देतो. त्यासाठी एजंटला दोन लाख रुपये द्यावे लागतील,” असे सांगितले. त्यांच्या बोलण्यावर विश्वास ठेवून नोकरीच्या आशेने संदिप मगर यांनी आरोपींना एकूण १ लाख ९९ हजार रुपये दिले.
मात्र, पैसे घेतल्यानंतर आरोपींनी संदिप यांना ना ऑईल टँकरवर नोकरी लावली, ना ट्रेनिंगचे कोणतेही सर्टिफिकेट दिले. आपली फसवणूक झाल्याचे लक्षात आल्यानंतर संदिप मगर यांनी अखेर गुरुवारी उमरगा पोलीस ठाणे गाठून तक्रार दाखल केली.
त्यांच्या फिर्यादीवरून उमरगा पोलिसांनी आरोपी तेजस शिंदे आणि अजय देवकर यांच्या विरोधात भारतीय दंड विधान संहितेच्या कलम ४२० (फसवणूक) आणि ३४ (समान उद्देश) अन्वये गुन्हा नोंदवला आहे. पोलीस आरोपींचा शोध घेत असून, अशा प्रकारच्या नोकरीच्या आमिषांना बळी न पडण्याचे आवाहन पोलिसांनी केले आहे.
