धाराशिव : पश्चिम महाराष्ट्रातील पुराचे अतिरिक्त ५० टीएमसी पाणी मराठवाड्याकडे वळविण्याच्या महत्त्वाकांक्षी प्रकल्पाला महत्त्वाची गती मिळाली असून, या प्रकल्पाचा सविस्तर प्रकल्प अहवाल (DPR) तयार करण्यासाठी प्रशासकीय मान्यता देण्यात आली आहे. यासाठी २४ कोटी रुपयांच्या निधीलाही मंजुरी मिळाल्याची माहिती खासदार ओमराजे निंबाळकर यांनी त्यांच्या फेसबुक पोस्टद्वारे दिली.
खासदार निंबाळकर यांनी म्हटले आहे की, व्यवहार्यता अहवाल (Feasibility Report) पूर्ण झाल्यानंतर आता प्रकल्पाच्या पुढील टप्प्यात सविस्तर प्रकल्प अहवाल तयार केला जाणार आहे. या अहवालाच्या आधारे प्रकल्पाची तांत्रिक रचना, खर्च, अंमलबजावणीची प्रक्रिया आणि पाणी वळविण्याचा आराखडा निश्चित केला जाईल.
मराठवाड्यातील पाणीटंचाई कमी करण्याच्या दृष्टीने हा प्रकल्प अत्यंत महत्त्वाचा मानला जात असून, पश्चिम महाराष्ट्रातील पुराचे अतिरिक्त पाणी मराठवाड्याकडे वळविल्यास शेती, पिण्याचे पाणी आणि औद्योगिक विकासाला मोठा हातभार लागण्याची अपेक्षा व्यक्त केली जात आहे.
खासदार ओमराजे निंबाळकर यांनी या निर्णयाचे स्वागत करत हा प्रकल्प मराठवाड्याच्या जलविकासासाठी महत्त्वपूर्ण टप्पा असल्याचे नमूद केले.
