धाराशिव: राजकारणात सध्या सत्तेची ओढाताण आणि स्वार्थाचे राजकारण पाहायला मिळत असताना, धाराशिवमध्ये मात्र एका वेगळ्या मैत्रीची आणि विश्वासाची चर्चा रंगली आहे. निमित्त आहे धाराशिव-कळंब मतदारसंघाचे आमदार कैलास पाटील यांच्या वाढदिवसाचे. आपल्या जिवलग मित्राच्या वाढदिवसानिमित्त खासदार ओमराजे निंबाळकर यांनी फेसबुकवर एक अत्यंत भावूक पोस्ट लिहून शुभेच्छा दिल्या आहेत.
‘राजकारणातील निर्मळ स्वभाव’
खासदार ओमराजे निंबाळकर यांनी आपल्या पोस्टमध्ये आमदार कैलास पाटील यांच्या कामाच्या पद्धतीचे आणि स्वभावाचे तोंडभरून कौतुक केले आहे. “आजच्या काळात राजकारणाने स्वार्थ, दिखावा आणि सत्तेची लालसा यांची खालची पातळी गाठलेली असताना कैलास दादांसारखी माणसं अजूनही आशेचा दिवा पेटवत उभी आहेत,” अशा शब्दांत त्यांनी आपल्या भावना व्यक्त केल्या.
आमदार कैलास पाटील यांचा स्वभाव पाण्यासारखा निर्मळ असून त्यांच्या मनात कोणतेही कपट किंवा शब्दांत दुटप्पीपणा नसल्याचेही ओमराजे यांनी आवर्जून नमूद केले.
सामान्यांसाठी धावून जाणारा नेता
पद आणि प्रतिष्ठेपेक्षा कैलास पाटील यांच्या मनात सामान्य माणसासाठी कायम जागा असते. मग तो शेतकऱ्याचा प्रश्न असो, विद्यार्थ्याची अडचण असो किंवा कार्यकर्त्याची वेदना; दादा प्रत्येक वेळी मनापासून धावून जातात. त्यांच्या कामातील ही तळमळ बनावटी नसून ती थेट अंतःकरणातून आलेली असते, असेही ओमराजे यांनी पोस्टमध्ये म्हटले आहे.
सोशल मीडियावर शुभेच्छांचा वर्षाव
ओमराजे निंबाळकर यांनी शेअर केलेली ही पोस्ट सध्या जिल्ह्यासह राजकीय वर्तुळात चर्चेचा विषय ठरत आहे. आपल्या मित्राला उत्तम आरोग्य आणि दीर्घायुष्य लाभो, अशी प्रार्थना करत त्यांनी कैलास पाटील यांना वाढदिवसाच्या शुभेच्छा दिल्या आहेत. या पोस्टनंतर शिवसैनिकांनी आणि समर्थकांनी आमदार कैलास पाटील यांच्यावर शुभेच्छांचा वर्षाव केला आहे.
