धाराशिव: महाराष्ट्राच्या राजकारणात सध्या गणिते वेगाने बदलत आहेत. पण धाराशिवच्या राजकीय पटलावर आता असा एक भूकंप येण्याची शक्यता आहे, ज्याने भाजप आमदार राणा जगजितसिंह पाटील यांची झोप उडवली आहे. शिवसेना ठाकरे गटाचे खासदार ओमराजे निंबाळकर हे ठाकरे गटाला ‘जय महाराष्ट्र’ करत थेट शिवसेना शिंदे गटात प्रवेश करणार असल्याचे जवळपास निश्चित मानले जात आहे. ओमराजेंची हीच ‘मशाल सोडून हाती धनुष्यबाण’घेण्याची तयारी आता राणा पाटलांसाठी मोठी डोकेदुखी ठरणार आहे.
जुने वैमनस्य, सत्तेचे समीकरण आणि राणा पाटलांची कोंडी!
ओमराजे निंबाळकर आणि राणा पाटील यांच्यातील कौटुंबिक आणि राजकीय वैमनस्य संपूर्ण महाराष्ट्राला माहीत आहे. ओमराजेंचे वडील पवनराजे निंबाळकर यांच्या हत्येचा आरोप आमदार राणा पाटलांचे वडील डॉ. पदमसिंह पाटील यांच्यावर आहे. तब्बल २० वर्षांनंतर, येत्या २० जून रोजी या प्रकरणाचा बहुप्रतीक्षित निकाल लागणार आहे.
ठाकरे गटाचे प्रवक्ते संजय राऊत यांच्या मते, “या निकालाच्या दबावापोटीच ओमराजे शिंदे गटात चालले आहेत.” कारण काहीही असो, पण जर ओमराजे निंबाळकर सत्ताधारी पक्षात आले, तर राणा पाटलांची महायुतीत भीषण कोंडी होणार हे उघड आहे. कालपर्यंत ज्यांच्याशी कट्टर फाईट होती, तेच आता सत्तेत सोबती म्हणून समोर बसणार असल्याने राणा पाटलांना ‘तोंड दाबून बुक्क्यांचा मार’ सहन करावा लागणार, अशी चर्चा जिल्ह्यात सुरू झाली आहे.
सोशल मीडियावर ‘वॉर’ आणि निष्ठेचा पाढा!
ओमराजे शिंदे गटात जाणार हे समजताच राणा पाटलांच्या ट्रोल आर्मीने सोशल मीडियावर मोर्चा उघडला. ‘पक्षनिष्ठा ते सत्यनिष्ठा’ असे ग्राफिक्स फिरवून ओमराजेंना ट्रोल करण्याचा प्रयत्न सुरू झाला. पण ओमराजे समर्थकांनीही या ट्रोलिंगला सडेतोड उत्तर दिले आहे.
“राणा पाटलांनी आम्हाला पक्षनिष्ठा शिकवू नये!”
– ओमराजे समर्थक
समर्थकांनी थेट पाटलांच्या घराण्याचा राजकीय ‘इतिहास’च बाहेर काढला आहे. त्यांनी आठवण करून दिली की:
-
डॉ. पदमसिंह पाटील यांची सुरुवात: शेकाप – काँग्रेस -एस काँग्रेस -पुन्हा काँग्रेस – राष्ट्रवादी!
-
आमदार राणा पाटील यांची सुरुवात: राष्ट्रवादी – थेट भाजप!
-
लोकसभेचे ‘फॅमिली’ चित्र: नवरा भाजपमध्ये, तर बायको राष्ट्रवादीमध्ये!
“ज्यांच्या घरात स्वतः अशा राजकीय कोलांटउड्या मारल्या गेल्या, त्यांनी दुसऱ्यांच्या निष्ठेवर बोलू नये,” असा टोला ओमराजे समर्थकांनी लगावला आहे.
⚖️ २० जून आणि राणा पाटलांचे भवितव्य!
एकीकडे ओमराजेंची सत्तेच्या दिशेने सुरू असलेली पावले आणि दुसरीकडे २० जून रोजी लागणारा पवनराजे निंबाळकर हत्याकांड प्रकरणाचा निकाल; या दोन गोष्टींवरच आता आमदार राणा पाटील यांचे राजकीय भवितव्य अवलंबून असणार आहे. निकाल काय लागतो आणि ओमराजेंच्या एन्ट्रीवर भाजप काय भूमिका घेते, याकडे आता संपूर्ण राज्याचे लक्ष लागले आहे.थोडक्यात काय, तर धाराशिवच्या या ‘पॉवर गेम’मध्ये राणा पाटलांची पुरती कोंडी झाली आहे, हे मात्र नक्की!
