धाराशिव: जिल्ह्यात अवैध व्यवसायांविरुद्ध सुरू असलेल्या विशेष मोहिमेअंतर्गत पोलीस प्रशासनाने लोहारा परिसरात सुरू असलेल्या जुगार अड्ड्यांवर धडक कारवाई केली आहे. पोलीस उपअधीक्षकांच्या पथकाने नियोजनबद्ध आखणी करून केलेल्या या छापेमारीत १२ संशयितांना ताब्यात घेण्यात आले असून, एकूण ९ लाख ३८ हजार १६० रुपयांचा मुद्देमाल जप्त करण्यात आला आहे.
लोहारा येथील काणेगाव रोड तसेच माकणी चौक परिसरातील ‘शंभूराजे हार्डवेअर’ येथे अवैधरित्या तीन पत्ती (तिरट) नावाचा जुगार खेळला जात असल्याची खात्रीशीर गोपनीय माहिती परि. पोलीस उपअधीक्षक श्री. अमोल मोहिते यांना मिळाली होती. या माहितीच्या आधारे पोलिसांच्या पथकाने दोन्ही ठिकाणी एकाच वेळी छापेमारी केली.
१२ संशयित ताब्यात, १ फरार
या संपूर्ण कारवाईत एकूण १३ संशयित निष्पन्न झाले. त्यापैकी १२ जणांना पोलिसांनी रंगेहात ताब्यात घेतले असून, एक संशयित आरोपी घटनास्थळावरून फरार झाला आहे. या सर्व आरोपींविरुद्ध लोहारा पोलीस ठाण्यात महाराष्ट्र जुगार प्रतिबंधक अधिनियम, १८८७ अन्वये गुन्हे दाखल करण्यात आले आहेत.
लाखोंचा मुद्देमाल जप्त
कारवाईदरम्यान पोलिसांनी घटनास्थळावरून खालील मुद्देमाल जप्त केला आहे:
-
जुगाराचे साहित्य आणि मोबाईल फोन
-
१ चारचाकी वाहन
-
६ दुचाकी वाहने
-
एकूण किंमत: रु. ९,३८,१६०/-
ही यशस्वी कारवाई धाराशिवच्या पोलीस अधीक्षक श्रीमती रीतु खोखर आणि अपर पोलीस अधीक्षक सचिन पांडकर यांच्या मार्गदर्शनाखाली पार पडली. परि. पोलीस उपअधीक्षक अमोल मोहिते यांनी या कारवाईचे नेतृत्व केले. या पथकात सहायक पोलीस निरीक्षक प्रवीण सोमवंशी, सुरेश कासुळे, पोलीस उपनिरीक्षक रामचंद्र बहुरे तसेच QRT (जलद कृती दल) पथकातील अंमलदार व चालकांचा समावेश होता.
पोलीस प्रशासनाचा इशारा: > धाराशिव जिल्ह्यात अवैध जुगार, मटका, हातभट्टी दारू, अवैध मद्यविक्री आणि अमली पदार्थांची तस्करी यांसारख्या बेकायदेशीर व्यवसायांविरुद्ध पोलीस प्रशासनाची मोहीम सातत्याने सुरू आहे. आगामी काळात ही कारवाई अधिक तीव्र केली जाईल, असा स्पष्ट इशारा पोलीस प्रशासनाने दिला आहे.
