परंडा – तालुक्यातील एका दुर्गम गावात 75 वर्षीय वृद्ध महिलेवर अत्यंत निर्घृण अत्याचार झाल्याची घटना समोर आली आहे. ही घटना दिनांक 8 ऑगस्ट 2024 रोजी दुपारी 3 वाजण्याच्या सुमारास घडली. पीडित महिला आपल्या शेतातून कामावरून घरी परतत असताना एका इसमाने तिच्यावर लैंगिक अत्याचार केला. ही घटना घडली त्यावेळी पीडिता एकटीच होती आणि आरोपीने याचाच फायदा घेतला.
पोलिसांनी दिलेल्या माहितीनुसार, आरोपीने वृद्ध महिलेला तिच्या पाठीमागून येऊन ओढत नेले आणि तिच्यावर बलात्कार केला. यानंतर आरोपीने पीडितेला जीवे मारण्याची धमकी दिली आणि घटनास्थळावरून पळून गेला. या धक्कादायक घटनेनंतर पीडित महिला संपूर्णपणे हादरून गेली होती. तिने धैर्य दाखवत तात्काळ पोलिस ठाण्यात धाव घेतली आणि तक्रार दाखल केली.
पीडितेच्या तक्रारीच्या आधारे पोलिसांनी आरोपी इसमाविरुद्ध भादंवि कलम 64, 351(2) (3) सह अनुसूचित जाती आणि अनुसूचित जमाती (अत्याचार प्रतिबंधक) कायदा कलम 3(1)(डब्ल्यू), 3(1) (व्ही) अन्वये गुन्हा दाखल केला आहे. सध्या आरोपी फरार असून पोलिस त्याच्या शोधात आहेत. पोलिसांनी आरोपीला पकडण्यासाठी विशेष पथक तैनात केले असून लवकरच त्याला अटक करण्यात येईल, असा विश्वास पोलिसांनी व्यक्त केला आहे.
या घटनेमुळे परिसरात भीतीचे वातावरण निर्माण झाले आहे. वृद्ध महिलेवर झालेल्या या अत्याचारामुळे संपूर्ण समाज हादरून गेला आहे. नागरिकांमध्ये संतापाची लाट उसळली असून आरोपीला कठोरात कठोर शिक्षा देण्याची मागणी होत आहे. सामाजिक संघटना आणि महिला कार्यकर्त्यांनी या घटनेचा तीव्र निषेध केला असून पीडित महिलेला न्याय मिळवून देण्यासाठी आंदोलन करण्याचा इशारा दिला आहे.
