परंडा : कुंभेजा (ता. परंडा) येथील शेतशिवारात मध्यरात्रीच्या सुमारास दरोडेखोरांनी धुमाकूळ घालत एका वृद्ध दांपत्यावर सशस्त्र हल्ला केल्याची भयंकर घटना घडली आहे. दागिने आणि पैसे देण्यास नकार दिल्याने दरोडेखोरांनी वृद्धावर चाकूने वार करून त्यांना गंभीर जखमी केले, तर त्यांच्या पत्नीच्या गळ्यातील ६० हजार रुपये किमतीचे सोन्याचे गंठण जबरदस्तीने हिसकावून नेले. शनिवारी (ता. २५) मध्यरात्री साडेबारा वाजता ही घटना घडली. याप्रकरणी परंडा पोलीस ठाण्यात पाच अज्ञात दरोडेखोरांवर गुन्हा दाखल करण्यात आला आहे.
याप्रकरणी लता विश्वनाथ जगताप (वय ६५, मूळ रा. कुंभेजा, ता. परंडा, जि. धाराशिव. सध्या रा. पिंपळे गुरव, पुणे) यांनी परंडा पोलिसांत फिर्याद दिली आहे. या हल्ल्यात त्यांचे पती विश्वनाथ जगताप हे गंभीर जखमी झाले आहेत.
पोलिसांनी दिलेल्या माहितीनुसार, लता जगताप आणि त्यांचे पती विश्वनाथ जगताप हे सध्या त्यांच्या कुंभेजा येथील घरी आले होते. शुक्रवारी रात्री ते त्यांच्या शेतशिवारातील घरासमोरील अंगणात झोपले होते. शनिवारी (ता. २५) मध्यरात्री १२.३० वाजेच्या सुमारास पाच अज्ञात दरोडेखोर तिथे आले. दरोडा टाकण्याच्या उद्देशाने आलेल्या या टोळीतील दोघांनी घराबाहेर पाळत ठेवली.
दरम्यान, एका चोरट्याने झोपलेल्या लता जगताप यांच्या गळ्यातील दोन तोळ्यांचे (अंदाजे ६० हजार रुपये किमतीचे) सोन्याचे गंठण जबरदस्तीने ओढून काढले. याच वेळी इतर दोन चोरट्यांनी विश्वनाथ जगताप यांना उठवून त्यांच्याकडे सोने आणि पैशांची मागणी केली. मात्र, विश्वनाथ जगताप यांनी त्यांना काहीही देण्यास ठाम नकार दिला. याचा राग आल्याने चोरट्यांनी त्यांच्यावर चाकूने हल्ला चढवला आणि त्यांना गंभीर जखमी केले.
पाच जणांवर गुन्हा दाखल:
घटनेनंतर चोरट्यांनी अंधाराचा फायदा घेत तेथून पोबारा केला. या थरारक घटनेनंतर जखमी अवस्थेतील पतीला उपचारासाठी दाखल करून लता जगताप यांनी शनिवारी परंडा पोलीस ठाण्यात फिर्याद दिली. यावरून पोलिसांनी पाच अज्ञात इसमांविरुद्ध भारतीय न्याय संहितेच्या (BNS) कलम ३११ अन्वये जबरी चोरी व दरोड्याचा गुन्हा दाखल केला आहे.
शेतवस्तीवर राहणाऱ्या वृद्ध दांपत्याला टार्गेट करून झालेल्या या सशस्त्र दरोड्यामुळे कुंभेजा आणि परंडा तालुक्यात दहशतीचे वातावरण निर्माण झाले आहे. परंडा पोलीस सध्या या फरार दरोडेखोरांचा कसून शोध घेत आहेत.
