परंडा : गाडीचा हेडलाईटचा फोकस जास्त का लावला, या क्षुल्लक कारणावरून एका तरुणाला पाच जणांनी मिळून शिवीगाळ करत काठीने आणि लाथाबुक्क्यांनी बेदम मारहाण केल्याची धक्कादायक घटना परंडा तालुक्यातील शिरसाव येथे घडली आहे. याप्रकरणी परंडा पोलीस ठाण्यात पाच आरोपींविरोधात गुन्हा दाखल करण्यात आला आहे.
मिळालेल्या माहितीनुसार, फिर्यादी समाधान धनाजी चोबे (वय ३५, रा. शिरगाव) हे दिनांक २४ जून २०२५ रोजी रात्री १० वाजण्याच्या सुमारास शिरसाव-भूम रस्त्यावरील केवढकर यांच्या शेताजवळून जात होते. यावेळी आरोपी सुरज महादेव डोके, ज्ञानेश्वर महादेव डोके, प्रतिक बाळासाहेब पाटील, प्रणव आण्णासाहेब डोके आणि रोहन दादा डोके (सर्व रा. वाकडी, ता. परंडा) यांनी त्यांची गाडी अडवली.
आरोपींनी चोबे यांना, “एअरटिगा गाडीचा फोकस जास्त का लावला?” असे म्हणत वाद घालण्यास सुरुवात केली. त्यानंतर गैरकायदेशीर जमाव जमवून त्यांना शिवीगाळ करत लाथाबुक्क्यांनी आणि काठीने मारहाण करून जखमी केले. तसेच, आरोपींनी चोबे यांना जीवे मारण्याची धमकीही दिली.
या घटनेनंतर पीडित समाधान चोबे यांनी २७ जून २०२५ रोजी परंडा पोलीस ठाण्यात धाव घेऊन तक्रार दाखल केली. त्यांच्या फिर्यादीवरून पोलिसांनी सुरज डोके, ज्ञानेश्वर डोके, प्रतिक पाटील, प्रणव डोके आणि रोहन डोके या पाच जणांविरोधात भारतीय न्याय संहितेच्या विविध कलमांनुसार (कलम 118(1), 115(2), 352, 351(3), 189(2), 189(3), 191(2), 191(3), 190) गुन्हा नोंदवला आहे. पोलीस या प्रकरणाचा पुढील तपास करत आहेत.
