धाराशिव: ‘गण गण गणात बोते’चा जयघोष… टाळ-मृदंगाचा निनाद… आणि विठूनामाच्या गजराने दुमदुमलेले आसमंत… अशा भक्तिमय वातावरणात संत गजानन महाराज यांच्या पालखीचे आज धाराशिव शहरात आगमन झाले. पंढरीच्या विठुरायाच्या भेटीची आस मनी धरून निघालेल्या या पायी दिंडीने अवघ्या शहरालाच पंढरीचे स्वरूप दिले आहे.
उपळे (माकडाचे) येथील मुक्काम आटोपून, माऊलींची पालखी ज्ञानेश्वर माऊलींच्या मंदिरात विसावली, आणि जणू दोन संतांच्या भेटीचा अनुपम सोहळाच धाराशिवकरांनी अनुभवला.
ज्ञानोबा-तुकोबांच्या जयघोषात, शहर झाले भक्तिमय!
शहराच्या प्रमुख मार्गांवरून पालखी मार्गस्थ होताना, रस्त्यारस्त्यांवर सप्तरंगी रांगोळ्यांच्या पायघड्या घालण्यात आल्या होत्या. स्वागत कमानी उभारून आणि भगवे ध्वज खांद्यावर घेऊन वारकऱ्यांच्या साथीने शहरवासीही या सोहळ्यात सामील झाले होते.
चालले गजानन पंढरीसी | भेटीच्या आसे विठ्ठलासी ||
टाळ-मृदंग वाजे गजरी | दुमदुमली धाराशिव नगरी ||
जिल्हाधिकारी कार्यालय, न्यायालय, बस स्थानक, छत्रपती शिवाजी महाराज चौक अशा प्रमुख मार्गांवरून फिरून पालखी लेडीज क्लब येथे मुक्कामासाठी विसावली. येथे माऊलींच्या दर्शनासाठी भाविकांनी रांगा लावल्या होत्या. प्रत्येकाच्या चेहऱ्यावर दर्शनाची आस आणि अथांग भक्ती स्पष्ट दिसत होती.
आजच्या मुक्कामानंतर, उद्या (शुक्रवारी) ही दिंडी तुळजाभवानीच्या दर्शनासाठी तुळजापूरकडे प्रस्थान करणार आहे. विठ्ठल भेटीच्या ओढीने निघालेल्या या वारीने धाराशिव शहरात मात्र भक्ती आणि चैतन्याचे बीज रोवले आहे.
पंढरपूर आणि श्री विठ्ठल: एक अलौकिक आख्यायिका
संत ज्ञानेश्वर: भागवत धर्माचे प्रणेते आणि ज्ञानाचे सूर्य
जगद्गुरू संत तुकाराम महाराज: अभंगवाणीचे अमर शिल्पकार
संत गोरा कुंभार: भक्ती आणि त्यागाची मूर्तिमंत कहाणी
संत जनाबाई: एका दासीची असामान्य भक्तीगाथा
Video
