कळंब – कळंब तालुक्यातील पश्चिम लोहटा ग्रामपंचायत कार्यालयात रोजगार सेवकाला मुदतवाढ देण्याबाबत घेतलेल्या निर्णयात बाजूने हात वर केल्याचा राग मनात धरून एका ५५ वर्षीय व्यक्तीला गैरकायद्याची मंडळी जमवून बेदम मारहाण केल्याची घटना समोर आली आहे. याप्रकरणी शिराढोण पोलीस ठाण्यात गावातील ८ जणांविरुद्ध विविध कलमान्वये गुन्हा नोंदवण्यात आला आहे.
नेमकी घटना काय?
पश्चिम लोहटा (ता. कळंब) येथील रहिवासी मधुकर रामराव आडसुळ (वय ५५ वर्षे) हे २५ ऑगस्ट २०२६ रोजी सकाळी ११.०० वाजेच्या सुमारास गावातील ग्रामपंचायत कार्यालयात उपस्थित होते. यावेळी रोजगार सेवक गोविंद आश्रुबा सावंत यास कामावर कायम ठेवण्यात यावे, या विषयावर मधुकर आडसुळ यांनी बाजूने हात वर केला.
या गोष्टीचा राग मनात धरून गावातीलच विनोद सोमनाथ सावंत, अमोल आडसुळ, संभाजी जाधव, किरण आडसुळ, रोहन आडसुळ, सुमित आडसुळ, संजय आडसुळ आणि शंकर जाधव (सर्व रा. पश्चिम लोहटा) यांनी बेकायदेशीर जमाव जमवला. आरोपींनी मधुकर आडसुळ यांना अश्लील शिवीगाळ करत लाथाबुक्क्यांनी तसेच दगडाने बेदम मारहाण करून जखमी केले आणि जीवे मारण्याची धमकी दिली.
शिराढोण पोलिसांत ८ जणांवर गुन्हा नोंद
उपचार घेतल्यानंतर मधुकर आडसुळ यांनी ११ सप्टेंबर २०२६ रोजी शिराढोण पोलीस ठाण्यात जाऊन फिर्याद दिली. त्यांच्या प्रथम खबरेवरून पोलिसांनी वरील आठही आरोपींविरुद्ध भारतीय न्याय संहिता (BNS) कलम ११८(१), ११५(२), ३५२, ३५१(२), १८९(२), १९१(२) आणि १९० अन्वये गुन्हा दाखल केला आहे. या प्रकरणाचा पुढील तपास शिराढोण पोलीस करत आहेत.
